უკრაინის დედაქალაქ კიევში აფეთქებები გრძელდება. ადგილობრივი მოსახლეობა ცდილობს თავი მეტროსადგურებს შეაფაროს. ხელისუფლება მოქალაქეებს თავშესაფრებში დარჩენისკენ მოუწოდებს.

დედაქალაქის მერის, ვიტალი კლიჩკოს განცხადებით, აფეთქება კიევის ცენტრალურ რაიონში მოხდა. ბოლო მონაცემებით, უკრაინის დედაქალაქში სარაკეტო იერიშების შედეგად გარდაცვლილია რვა ადამიანი, ხოლო დაშავებულია 24 პირი.

"დედაქალაქი რუსების თავდასხმის ქვეშაა! რაკეტები მოხვდა ობიექტებს ქალაქის ცენტრში, შევჩენკოვისა და სოლომიანსკის რაიონებში. საჰაერო განგაში და შესაბამისად საფრთხე გრძელდება", - განაცხადა ვიტალიკლიჩკომ.

მისივე თქმით, კიევის ცენტრალური ქუჩები სამართალდამცველებმა გადაკეტეს, ადგილზე კი სამაშველო სამსახურები მუშაობენ.

ავიაიერიში განხორციელდა ლვოვზეც. ქალაქში მასიური თავდასხმების გამო, სკოლები დაიხურა და შეფერხებები იყო მობილურ ქსელებში. ვრცელდება ინფორმაცია ხარკოვის დაბომბვის შესახებაც.

პარალელურად, აფეთქებების ხმა ისმის დნეპროპეტროვსკში, ხმელნიცკსა და ჟიტომირში. უკრაინული მედია წერს, რომ აღნიშნულ ქალაქებში საჰაერო თავდაცვის სისტემა მუშაობს. ამ დრომდე მთელი უკრაინის მასშტაბით საჰაერო განგაშია გამოცხადებული.