17 სექტემბერი, 2022

გერმანია-ესპანეთის ნახევარფინალი დაძაბული და სანახაობრივი გამოდგა. თამაშში გამარჯვებულის ვინაობა თითქმის ბოლო წამამდე გაურკვევლი იყო.

პირველი მეოთხედი ესპანელებმა 3 ქულით მოიგეს, რასაც გერმანელებმა მეორე მეოთხედში ბრწყინვალე თამაში დაუპირისპირეს – ეს მონაკვეთი გორდონ ჰერბერტის გუნდმა 8 ქულით, ტაიმი კი 5 ქულით მოიგო.

შეუჩერებელი იყო გერმანელთა ლიდერი დენის შრიოდერი, რომელმაც შესანიშნავი მატჩი ჩაატარა და კიდევ ერთხელ ულიდერა თავის გუნდს. შრიოდერი ორივე გუნდის შემადგენლობაში საუკეთეო იყო 30 ქულითა და 8 პასით. თუმცა არანაკლებ ბრწყინვალე შეხვედრა ჩაატარა ესპანელთა შემადგენლობაში ლორენცო ბრაუნმა – მან თავის გუნდს 29 ქულა შესძინა. შრიოდერისგან განსხვავებით, ბრაუნი უფრო შედეგიანი და სასარგებლო შეხვედრის დასკვნით ნაწილში იყო, როდესაც გადაწყდა კიდეც მატჩის ბედი.

გადამწყვეტი მეოთხე მეოთხედი აღმოჩნდა, რომელიც უკეთესად ესპანელებმა ჩაატარეს, 11 ქულით მოიგეს და დამსახურებულად მოიპოვეს ფინალის საგზური, სადაც მათი მეტოქე საფრანგეთის ეროვნული ნაკრები იქნება.

გერმანია-ესპანეთი 91:96

18 სექტემბერი

მატჩი მესამე ადგილისთვის

19:15 გერმანია-პოლონეთი

ფინალი

22:30 ესპანეთი-საფრანგეთი

ავტორი - ვაჟა სიმონიშვილი