23 სექტემბერი, 2022

სექტემბრის ბოლო დღეებში ქუთაისი რამდენიმე მნიშვნელოვან კულტურულ-შემოქმედებით ღონისძიებას უმასპინძლებს. ამის შესახებ ინფორმაციას ქუთაისის მუნიციპალიტეტის მერია ავრცელებს.

მათივე ცნობით, 24 სექტემბერს მეორედ აიღებს სტარტს ქუთაისის საერთაშორისო მოკლემეტრაჟიანი ფილმების ფესტივალი.

ამასთან, აღნიშნავენ, რომ 26 სექტემბერს, დავით კაკაბაძის სახელობის გალერეაში, პეტრე ოცხელის დაბადებიდან 115 წლისთავის აღსანიშნავად , ხელოვნების სასახლის ინიციატივითა და ქუთაისის მერიის მხარდაჭერით, ერთთვიანი ექსპოზიცია გაიმართება, სადაც დიდი მხატვრის 100-მდე ნამუშევარი იქნება წარმოდგენილი.

„ქუთაისში გრძელდება საინტერესო და მრავალფეროვანი კულტურული ღონისძიებები. წელს მეორედ ვატარებთ ქუთაისის საერთაშორისო მოკლემეტრაჟიანი ფილმების ფესტივალს, სადაც წარმოდგენილი იქნება ქართველი და უცხოელი რეჟისორების მოკლემეტრაჟიანი ფილმები. ფესტივალი 24 სექტემბერს გაიხსნება. ეს ფესტივალი უკვე თავს იმკვიდრებს მსოფლიო კინოფესტივალებს შორის. 6 დღის განმავლობაში ბევრი ცნობილი რეჟისორი, მსახიობი და კინოინდუსტრიის წარმომადგენელი გვეყოლება ქალაქში სტუმრად.

26 სექტემბერს დავით კაკაბაძის სახელობის გალერეაში გაიხსნება პეტრე ოცხელის 115 წლისადმი მიძღვნილი გამოფენა, სადაც ჩვენი საამაყო თანაქალაქელი მხატვრის 100-მდე ნამუშევარი ერთი თვის მანძილზე იქნება გამოფენილი.

ასე რომ, ქუთაისელებს და ჩვენი ქალაქის სტუმრებს საინტერესო და მრავალფეროვან ღონისძიებებზე ვეპატიჟებით“, - აცხადებს ქუთაისის მერი იოსებ ხახალეიშვილი.