ხვიჩა კვარაცხელია სალერნიტანასთან ვერ ითამაშებს. ინფორმაცია ლუჩანო სპალეტიმ დაადასტურა. მისი თქმით, ქართველი ფეხბურთელი გუნდთან ერთად სალერნოში არ გაემგზავრება.

„კვარაცხელია სალერნოში გასვლით მატჩზე არ წამოვა. დღეს მას სიცხე არ აქვს, მაგრამ ექიმი ჯერ კიდევ წამლებს უნიშნავს და მკურნალობს. „კრემონეზესთან“ წაგებამ გული დაგვწყვიტა, მაგრამ ეს გუნდის წევრების განწყობაზე არ ასახულა. ველოდები სწორ რეაგირეას იმ გუნდისგან, რომელსაც რთულ მატჩი ელის. ძალიან მნიშვნელოვანი შედეგისთვის ვიბრძვით და ერთი სული გვაქვს, როდის ვითამაშებთ“, – განაცხადა ლუჩანო სპალეტიმ.

ამგვარად, 21 წლის ქართველი ფეხბურთელი ზედიზედ მეორე მატჩს გამოტოვებს, მანამდე იტალიის თასზე, კრემონეზესთან ვერ ითამაშა. კვარამ ვირუსის გამო მიმდინარე კვირაში ვარჯიშიც ვერ მოახერხა.

შეგახსენებთ, რომ სალერნიტანასა და ნაპოლის მატჩი 21 იანვარს, თბილისის დროით 21:00 საათზე გაიმართება. კვარაცხელიამ მიმდინარე სეზონში 20 მატჩში 9 გოლი გაიტანა, 10 საგოლე პასი გააკეთა და 3-ჯერ პენალტი მოიპოვა.