საქართველო ზამთრის სეზონს ენერგეტიკულად მზად ხვდება, როგორც ელექტროენერგიით, ასევე ბუნებრივი აირით უზრუნველყოფის ნაწილში, განაცხადა სემეკის თავმჯდომარემ დავით ნარმანიამ მედიაცენტრ „მთავარში“ გამართულ პრესკონფერენციაზე.

როგორც სემეკის თავმჯდომარემ აღნიშნა, ბუნებრივ აირზე ფასების ზრდა მოსალოდნელი არ არის. მისი განცხადებით, ქვეყანას აზერბაიჯანთან აქვს გრძელვადიანი შეთანხმება ბუნებრივი აირით უზრუნველყოფაზე, მიწოდების ფასები კი უცვლელი იქნება.

„ბუნებრივი გაზის სექტორში გვიწევს მიმდინარე წლის დეკემბერში ახალი ტარიფების დადგენა, თუმცა, არსებული ვალუტის გაცვლითი კურსის და სხვა ფაქტორების გათვალისწინებით, რაიმე სახის ზრდას ბუნებრივ აირზეც არ ველოდებით“, - აღნიშნა ნარმანიამ.

ნარმანიამ განმარტა, რომ საქართველო ბუნებრივი აირის უზრუნველყოფის ნაწილში თითქმის 90 პროცენტით აზერბაიჯანზეა დამოკიდებული და, რუსეთისთვის დაწესებული სანქციების ფონზე, ელექტროენერგიისა და ბუნებრივი აირის მიწოდების მიმართულებით ქვეყანას საფრთხე არ ემუქრება.

„იმპორტიორ ქვეყნად კვლავ აზერბაიჯანი რჩება. იმპორტი რუსეთიდან არ ხორციელდება, რადგან არ გვჭირდება. რაც შეეხება ბუნებრივ აირს, მცირე მოცულობით ხდება შემოტანა, ისიც სისტემის დაბალანსებისთვის, ანუ ტექნიკური საჭიროებიდან გამომდინარე. თუმცა 90%-ზე მეტი ყოველწლიურად კვლავაც აზერბაიჯანიდან შემოდის“, - განაცხადა დავით ნარმანიამ.

სემეკის თავმჯდომარე ასევე ელექტროენერგეტიკის საკითხსაც შეეხო და აღნიშნა, რომ ენგურჰესის რეაბილიტაციის შედეგად, გასული წლის ანალოგიურ პერიოდთან შედარებით, საქართველოში წელს ელექტროენერგიის გამომუშავება თითქმის 10%-ით გაიზარდა.