„ლა რეპუბლიკას“ ცნობით, ნატო-ს დაზვერვა მოკავშირეებს აფრთხილებს, რომ რუსეთი სავარაუდოდ უპილოტო წყალქვეშა აპარატ „პოსეიდონის“ გამოსაცდელად ემზადება.

როგორც იტალიური გამოცემა წერს, რუსული ატომური წყალქვეშა ნავი „ბელგოროდი“ თეთრ ზღვაში მდებარე ბაზიდან უკვე გავიდა და სავარაუდოდ, კარის ზღვისკენ მიემართება, სადაც ბირთვულ ცდას ჩაატარებს.

„ლა რეპუბლიკას ცნობით, „პოსეიდონი“ გასაიდუმლოებული იარაღია, რომელსაც, გავრცელებული ცნობით, შეუძლია წყალქვეშ დიდი მანძილი გაიაროს და აფეთქების შემდეგ ბირთვული ცუნამი გამოიწვიოს, რასაც ქალაქების დატბორვა შეუძლია. საუბარია 24-მეტრიან აპარატზე, რომელიც ბირთვული ქობინით არის აღჭურვილი, რომელის სიმძლავრეც, დიდი ალბათობით, ორი მეგატონაა.

„ძალიან ცოტას სჯერა, რომ „პოსეიდონი“ უკვე მზადაა, თუმცა, მისი გამოცდის შესახებ განცხადება კრემლს საშუალებას მისცემდა, ეჩვენებინა, რომ დასავლეთთან ბრძოლის უნიკალური საშუალება გააჩნია, რომლისგან დაცვაც არ არსებობს“, – ნათქვამია იტალიური გამოცემის პუბლიკაციაში.

„ლა რეპუბლიკა“ წერს, რომ წყალქვეშა ნავი „ბელგოროდი“ ბოლო პერიოდში რამდენჯერმე იყო ნახსენები გაზსადენ „ჩრდილოეთის ნაკადზე“ მოწყობილი დივერსიების შესახებ საუბრისას, თუმცა ამ წყალქვეშა ნავის გაზსადენის აფეთქებაში მონაწილეობას სპეციალისტები გამორიცხავენ.

რუსეთის მიერ ბირთვული იარაღის გამოყენების მუქარა ბოლო პერიოდში რამდენჯერმე გაჟღერდა.