„უძლურის დღიური“ - ასე ჰქვია წიგნს, რომელიც საზოგადო მოღვაწის, ლევან ვასაძის ავტორობით გამოიცა და რომლის პრეზენტაციაც 23 დეკემბერს „ბაგრატიონი ჰოლში“ გაიმართა.

„უძლურის დღიური“ მემუარული ჩანაწერებია და ის ავტორის ცხოვრების მნიშვნელოვან ეტაპს ასახავს. წიგნში ლევან ვასაძე არაერთ საჭირბოროტო და ქვეყნისთვის მნიშვნელოვან თემაზეც საუბრობს. დღიურში მრავლად შეხვდებით მსჯელობებს სხვადასხვა პოლიტიკურ, ფილოსოფიურ, ლიტერატურულ საკითხზე, ავტორისა და სხვა პოეტთა ლექსებს, ხედვას ჩვენი ქვეყნისა თუ საზოგადო მომავლის შესახებ.

„უძლურის დღიური“ - ეს არის ერთგვარი პასუხი იმ განსაცდელზე, რომელიც ავტორისთვის ერთგვარ შინაგან გამოცდილებად იქცა. წიგნი იმ ჩანაწერებისგან შედგება, რომელსაც ლევან ვასაძე მძიმე ავადმყოფობის ჟამს წერდა. სწორედ აქედან შეირჩა მისი სახელწოდებაც: „უძლურის დღიური“. აღსანიშნავია, რომ ავტორმა წიგნი მამის, შიო ვასაძის ხსოვნას მიუძღვნა.

ლევან ვასაძე აღნიშნავს, რომ საკუთარი გამოცდილების გაზიარებით მას განსაცდელში მყოფი ადამიანებისთვის იმედის შენარჩუნება და გასავლელი გზის ოდნავ მაინც შემსუბუქება სურდა.

წიგნის შეძენას მსურველები „სამოსელი პირველის“ მაღაზიაში შეძლებენ, რომელიც თბილისში, ქიაჩელის 10 ნომერში მდებარეობს.