28 აგვისტო, 2022

ლიბიის დედაქალაქ ტრიპოლში, შეიარაღებულ ჯგუფებს შორის შეტაკებების შედეგად დაღუპულთა რაოდენობა 23-მდე გაიზარდა, - ამის შესახებ სააგენტო „ანადოლუ“ წერს.

ლიბიის ჯანდაცვის სამინისტროს ცნობით, დაპირისპირებების შედეგად, 140-მდე ადამიანია დაშავებული.

შეტაკებების მონაწილეები საავადმყოფოებსაც არ ერიდებიან - „ანადოლუ“, ლიბიის ჯანდაცვის სამინისტროზე დაყრდნობით, წერს, რომ დღეს დილიდან ბომბავენ სამედიცინო დაწესებულებებსაც.

შეტაკებების გამო, განათლების სამინისტრომ საშუალო სკოლის გამოსაშვები გამოცდები გააუქმა, ხოლო Libyan Wings Airlines-მა დროებით შეაჩერა ფრენები თურქეთისა და ტუნისის მიმართულებით.

დაპირისპირება პარლამენტის მიერ არჩეული პრემიერის და ეროვნული ერთობის მთავრობის მეთაურის მომხრეებს შორის მოხდა. გავრცელებული ინფორმაციით, პრემიერის მომხრეებმა ტრიპოლის აეროპორტის ტერიტორია დაიკავეს. ქალაქში მთელი დღე ისმოდა სროლისა და აფეთქებების ხმა. ფაჰტი ბაშაგი პარლამენტმა პრემიერად თებერვალში აირჩია, მოქმედმა პრემიერმა, კი მისი უფლებამოსილება არ ცნო.