ლიეტუვის პრეზიდენტის, გიტანას ნაუსედას განცხადებით, უკრაინაში კორუფციული სკანდალები მნიშვნელოვან გავლენას ახდენს დასავლეთის ქვეყნების გადაწყვეტილებაზე, კიევისათვის იარაღის მიწოდების თაობაზე.

"ეს ძალიან სერიოზული მიზეზია, ვინაიდან, ის ქვეყნები, რომლებიც უკრაინას ეხმარებიან, დემოკრატიული ქვეყნები არიან, რაც იმას ნიშნავს, რომ მათ უნდა გაითვალისწინონ თავიანთი საზოგადოების, ამომრჩევლის აზრი. წარმოიდგინეთ, რომ ამა თუ იმ სახელმწიფოს ამომრჩეველი ხედავს, რომ ქვეყანაში, რომელსაც დახმარებას უგზავნიან, სერიოზული კორუფციული სკანდალებია. ეს დიდი დარტყმაა ამ სახელმწიფოს რეპუტაციისთვის", - განაცხადა გიტანას ნაუსედამ.

ლიეტუვის პრეზიდენტმა თავისი კომენტარი მას შემდეგ გააჟღერა, რაც უკრაინის პრეზიდენტმა ვოლოდიმირ ზელენსკიმ თავდაცვის მინისტრის ოლექსი რეზნიკოვის რუსტემ უმეროვით ჩანაცვლების გადაწყვეტილება მიიღო, რომელიც გასული წლიდან სახელმწიფო ქონების ფონდს ხელმძღვანელობდა. მიუხედავად იმისა, რომ უკრაინის პრეზიდენტს თავის გამოსვლაში კორუფცია არ უხსენებია, გავრცელებული ინფორმაციით, უკრაინის თავდაცვის სამინისტროში გამოძიება დაიწყო იარაღის შესყიდვის დროს ქრთამის აღების და თანამდებობის ბოროტად გამოყენების კუთხით.