2 სექტემბერი, 2022

გერმანული ავიაკომპანიის, „ლუფთჰანზას“ მფრინავების გაფიცვის გამო, ფრანკფურტსა და მიუნხენში 800-მდე რეისი გაუქმდა. ინფორმაციას ამის შესახებ „როიტერი“ ავრცელებს.

ავიაკომპანიის მონაცემებით, გაფიცვა 130 ათას მგზავრს შეეხება. კომპანიაში აღნიშნავენ, რომ მუშაობენ გაფიცვის შედეგების მინიმალიზებისთვის.

„ლუფთჰანზას“ ხუთი ათასზე მეტი მფრინავი ხელფასის გაზრდის მოთხოვნით გაიფიცა. საპროტესტო ზომას მას შემდეგ მიმართეს, რაც მფრინავების პროფკავშირსა და ავიაკომპანიის ხელმძღვანელობას შორის მოლაპარაკებები უშედეგოდ დასრულდა. პროფკავშირი მიმდინარე წელს მფრინავებისთვის ხელფასის 5,5 პროცენტით გაზრდას და ინფლაციის ავტომატური კომპენსაციის დაწესებას ითხოვს. „ლუფთჰანზას“ ხელმძღვანელობის განცხადებით, აღნიშნული მოთხოვნის შესრულება პერსონალის ხარჯებს მომავალი ორი წლის განმავლობაში 40%-ით, ანუ 900 მილიონი ევროთი გაზრდის. ავიაკომპანიამ მფრინავებს ხელფასის ჯამში 900 ევროთი გაზრდა შესთავაზა ორ ეტაპად, 18-თვიანი პერიოდის განმავლობაში.

აგვისტოს დასაწყისში „ლუფთჰანზას“ მენეჯმენტმა კომპანიის სახმელეთო პერსონალთა შეთანხმებას მიაღწია მას შემდეგ, რაც მათი გაფიცვის გამო ათასზე მეტი რეისი გაუქმდა. მაშინ მიღწეული შეთანხმების მიხედვით, ავიაკომპანიის 20 ათასამდე თანამშრომელს 2023 წლის იანვრიდან ყოველთვიური ანაზღაურება 2.5%-ით გაეზრდება, შემდეგი წლის პირველი ივლისიდან კი – კიდევ 2.5%-ით.