ხელისუფლებას ფაქტობრივად საბოტაჟის ფონზე უწევს 12 რეკომენდაციაზე მუშაობა, ოპოზიციაზე და ენჯეოსექტორზე ოლიგარქიული გავლენების გამო, საქართველოს ევროპული მომავლისკენ სვლას ოპოზიციის რადიკალური ნაწილი საბოტაჟით პასუხობს, ხოლო ნაწილს არ ჰყოფნის იმის გამბედაობა, რომ „ნაციონალური მოძრაობის“ და მისი ენჯეოების მიერ დადგენილ ტრენდს აცდეს, განაცხადა ფრაქცია „ქართული ოცნების“ თავმჯდომარემ, მამუკა მდინარაძემ..

მისი თქმით, ოპოზიციის ნაწილის მიერ ოლივერ ვარჰეისთან დაკავშირებულმა განცხადებებმა აჩვენა, რატომ არ ჩაერთნენ სამუშაო ჯგუფებში და რატომ არ უჭერენ მხარს კანონპროექტებს.

„ევროკომისარ ოლივერ ვარჰეის ვიზიტზე ოპოზიციის რეაქციებმა დაადასტურა, რომ მათი მიზანია, საქართველოს არ მიენიჭოს კანდიდატის სტატუსი. რასაც ისინი არ აღიარებდნენ ვიზელიბერალიზაციის პროცესისას, თუ როგორ დადიოდნენ ბრიუსელში კორიდორებში, რომ არ მოეცათ თავისუფალი რეჟიმი, გუშინ იმდენად აგონიაში ჩავარდნენ, რომ პირდაპირ ეთერში ანახეს ჩვენს მოსახლეობას, როგორ ებრძვიან საკუთარ ქვეყანას. გუშინ მათ ფაქტობრივად ღია ეთერებით გვაჩვენეს, როგორია მათი ტაქტიკა საქართველოს წინსვლის შესაფერხებლად – საკუთარი ქვეყნის მაქსიმალურად ნეგატიურ ჭრილში წარმოჩენა, ყველა ევროპელზე თავდასხმა, ვინც კი რაიმე პოზიტიურს იტყვის საქართველოზე, საქართველოს მიმართ პოზიტიური გზავნილების გაჟღერებისთანავე, საკუთარი უცხოელი თანამზრახველების გააქტიურება ნეგატიური დღის წესრიგის შემობრუნებისათვის", - განაცხადა მდინარაძემ.

ოლივერ ვარჰეი საქართველოში სამუშაო ვიზიტით იმყოფება. მთავრობის თავმჯდომარის, ირაკლი ღარიბაშვილის გარდა, ის საქართველოს პრეზიდენტს, სალომე ზურაბიშვილს, პარლამენტის თავმჯდომარეს, შალვა პაპუაშვილსა და სხვადასხვა პოლიტიკური ძალის წარმომადგენლებს შეხვდება.