მარიუშ ბლაშჩაკი - მოლოდინი არ გამართლდა, გერმანიამ, რომელსაც პოლონეთის მიერ უკრაინაში გაგზავნილი 250 ტანკი უნდა ჩაენაცვლებინა, სანაცვლოდ მხოლოდ 20 ტანკი შემოგვთავაზა
31 აგვისტო, 2022
„პოლონეთმა უკრაინას 250 ტანკი გაუგზავნა, ხოლო, გერმანიამ დაპირება, რომ ამ ტანკებს ჩაანაცვლებდა, არ შეასრულა და შესაბამისად, პოლონეთის მოლოდინები არ გამართლდა“ - ამის შესახებ გაზეთ „პოლსკა ტაიმსისთვის“ მიცემულ ინტერვიუში პოლონეთის ვიცე-პრემიერმა და თავდაცვის მინისტრმა, მარიუშ ბლაშჩაკმა განაცხადა.
„მე ჩემს გერმანელ კოლეგას, კრისტინა ლამბრეხტს ღიად ვუთხარი, რომ ჩვენ სულ მცირე ერთი სატანკო ბატალიონით მაინც ვართ დაინტერესებულები, რომელიც დასავლეთ ევროპის სტანდარტით 44 მანქანას შეადგენს. ჩვენ კი სანაცვლოდ 20 ტანკი შემოგვთავაზეს, რომელთაგან პირველი მხოლოდ მომავალ წელს ჩამოვიდოდა. ეს შეთავაზება ჩვენს მოლოდინებს არ შეესაბამება და ყოვლად უსარგებლოა“, – თქვა ბლაშჩაკმა.
თავდაცვის მინისტრმა დასძინა, რომ ლამბრეხტს წერილობით უპასუხა, სადაც განაცხადა, რომ პოლონეთი გერმანიისგან მთლიანი სატანკო ბატალიონის მიღებას იმედოვნებდა. ბლაშჩაკმა აღნიშნა, რომ თუ გერმანია მხოლოდ 20 მანქანას გამოგზავნის, ეს დიდად ვერ შეცვლის არსებულ ვითარებას. „თუმცა, ჩვენ გერმანიის ლოდინის იმედად არ ვართ და თავად დავიწყებთ ამ მიმართულებით ინტენსიურ მუშაობას“, – თქვა ბლაშჩაკმა.
მისივე განცხადებით, ამერიკული Abrams-ის პირველი ტანკები, რაც შედარებით ძველი მოდელია, პოლონეთში მომავალ წელს ჩავა. გარდა ამისა, ბლაშჩაკის თქმით, წელს პოლონეთის ჯარი თანამედროვე K2 ტიპის კორეულ ტანკებსაც მიიღებს.
ბლაშჩაკი ასევე ფიქრობს, რომ გერმანიის პოლიტიკა საშიშია ევროპისთვის და პუტინს საშუალებას აძლევს დააფინანსოს თავისი არმია. ”გერმანიის პოლიტიკა ეფუძნება რუსეთთან ბიზნესის კეთებას და ნამდვილად არ იძლევა ჩვენი უსაფრთხოების გარანტიას”, - თქვა მან.
პოლონეთის თავდაცვის მინისტრი გერმანიის პოლიტიკას იმედგაცრუებად მიიჩნევს, „მაგრამ ქვეყნის ამგვარი პოლიტიკა, სამწუხაროდ, არ დაწყებულა გუშინ, ოლაფ შოლცის ხელისუფლებაში მოსვლის შემდეგ. ქვეყნის პოლიტიკა ჯერ კიდევ ანგელა მერკელის კანცლერობის დროს იყო იმედგაცრუებით სავსე,“ - განაცხადა მან.
ბლაშჩაკის თქმით, პოლონეთის ოპოზიცია თავისი პოზიციების განტკიცებას გერმანიასთან დაახლოებით ცდილობდა, თუმცა, ეს პოლიტიკა არ უწყობს ხელს ხალხის დაცვას.
”გერმანიის პოლიტიკა ორიენტირებულია რუსეთთან ბიზნესის კეთებაზე”, - თქვა ბლაშჩაკმა და დასძინა, რომ პოლონეთის უსაფრთხოების ერთადერთი გარანტია არის მისი ურთიერთობა ამერიკის შეერთებულ შტატებთან, ნატო-სთან და პოლონეთის შეიარაღებული ძალების პოტენციალის გაზრდა.
