მაროკოში მიწისძვრის შედეგად დაღუპულთა რაოდენობამ 2 800-ს გადააჭარბა. დაშავებულია 2 562 მოქალაქე. ნანგრევებში მოყოლილთა გადასარჩენად სამძებრო-სამაშველო ოპერაციები უწყვეტ რეჟიმში მიმდინარეობს.

სამძებრო სამუშაოებში სამაშველო ჯგუფები ესპანეთიდან, დიდი ბრიტანეთიდან და კატარიდან ჩაერთნენ.

როგორც მედია წერს, მიწისძვრის ზონის დიდი ნაწილი ძნელად მისადგომ რაიონებშია და ხელისუფლებას ამ ტერიტორიაზე მცხოვრები დაკარგული ადამიანების აღწერა არ გაუკეთებია.

სტიქიამ ყველაზე მეტად მარაკეში დააზიანა, რომელიც „იუნესკოს“ მსოფლიო მემკვიდრეობის ძეგლთა სიაშია. ჯანდაცვის მსოფლიო ორგანიზაციის განცხადებით, მარაკეშსა და მიმდებარე რაიონებში 300 000-ზე მეტი ადამიანი დაზარალდა.

ქვეყანაში სამდღიანი გლოვაა გამოცხადებული.