მატეუშ მორავიეცი - პუტინის რეჟიმი სუსტებდა, ამიტომ მიდის კონფლიქტის გამწვავებაზე და უახლოეს მომავალში შესაძლოა, ვიხილოთ აგრესიის ესკალაცია
25 სექტემბერი, 2022
პუტინის რეჟიმი სუსტებდა, ამიტომ ის კონფლიქტის გამწვავებაზე მიდის და უახლოეს მომავალში, შესაძლოა, აგრესიის ესკალაცია ვიხილოთ, – ამის შესახებ პოლონეთის პრემიერ-მინისტრმა, მატეუშ მორავიეცკიმ პოლონეთის რადიოსთან ინტერვიუში განაცხადა.
„რუსული დათვი დაჭრილია და სამწუხაროდ, უახლოეს მომავალში შესაძლოა ველოდოთ ძალადობის ესკალაციას და რუსული აგრესიის ახალ ტალღებს. ეს არ ცვლის იმ ფაქტს, რომ პუტინის რეჟიმი ყოველდღიურად სუსტდება. შეჭრის დასაწყისიდანვე მთელი მსოფლიო უყურებს, როგორ ირცხვენს თავს რუსული არმია, გასული ეპოქის ნახევრად გაცვეთილი აღჭურვილობა, ბრძოლის ველზე მიტოვებული ტანკები, ტყვედ ჩაბარებული სამხედროები რომლებიც ამბობენ, რომ მათ უთხრეს, თითქოს სამხედრო წვრთნაზე მიდიოდნენ“, – განაცხადა პოლონეთის პრემიერმა.
მორავიეცკის თქმით, პუტინი დიდხანს ცდილობდა, ფრონტზე ეთნიკური რუსები არ გაეგზავნა, ამიტომ, მან პირველ რიგში აზიური უმცირესობების წარმომადგენლები გაგზავნა.
ავტორი - თამთა რუხაძე
