მატეუშ მორავიეცკის განცხადებით, პოლონეთმა უარყო ევროკავშირის გეგმა არალეგალური მიგრანტების მიღების შესახებ
პოლონეთის პრემიერ-მინისტრის, მატეუშ მორავიეცკის განცხადებით, პოლონეთმა ევროკავშირის გეგმა არალეგალური მიგრანტების მიღების შესახებ უარყო.
ამის შესახებ მატეუშ მორავიეცკიმ ესპანეთის ქალაქ გრანადაში ევროკავშირის ქვეყნების ლიდერების შეხვედრის დაწყებამდე განაცხადა.
„მიმდინარე წლის ივნისში, ბერლინის ბრძანებით, პოლონელი ოპოზიციის ლიდერის, დონალდ ტუსკის პარტიის მხარდაჭერით, ბრიუსელმა თავისი გეგმის განხორციელება დაიწყო, რაც არალეგალური მიგრანტების მიღებას გულისხმობს. იმ შემთხვევაში, თუ რომელიმე ქვეყანა უარს იტყვის მიგრანტების მიღებაზე, მათ საშინელ ჯარიმებს დაუწესებენ. გუშინ რამდენიმე პრემიერ-მინისტრს ვუთხარი და დღესაც პლენარულ სხდომაზე ვიტყვი, რომ პოლონეთი ამას საბოლოოდ უარყოფს, პირველ რიგში, ჩვენი ქვეყნის უსაფრთხოებისთვის“, – განაცხადა მორავიეცკიმ.
შეთანხმების თანახმად, ქვეყნებს, რომლებიც ბევრ მიგრანტს იღებენ, შეუძლიათ თავშესაფრის პროცედურები დააჩქარონ და ევროკავშირის სხვა ქვეყნებისგან სწრაფი დახმარება - მათ შორის ფინანსური დახმარებაც - მოითხოვონ. პოლონეთი ახლო აღმოსავლეთიდან და აფრიკიდან მიგრანტების მიღებაზე უარს ამბობს.
