ერევანში, პოლიციის ერთ-ერთი სამმართველოს შენობაში შეიარაღებული პირები შეიჭრნენ. ინფორმაციას სომხური მედია ავრცელებს.

გავრცელებული ინფორმაციით, პოლიციის შენობასთან ყუმბარა აფეთქდა. ადგილობრივი მედიის ცნობით, არიან დაჭრილები.

ამასთან, მედიის ინფორმაციით, პოლიციის შენობაში შეიჭრნენ ორგანიზაცია „საბრძოლო ძმობის“ წევრები, რომლებიც ორგანიზაციის იმ წევრების გათავისუფლებას ითხოვდნენ, ვინც პოლიციამ დღეს დილით დააკავა.

პოლიციის შენობასთან სპეცდანიშნულების რაზმები მივიდნენ. სპეცოპერაციის შედეგად პოლიციამ შეიარაღებული პირი დააკავა. კიდევ ორი პირი, რომლებიც ერთ-ერთი სამმართველოს შენობაში შეჭრას ცდილობდნენ, დაშავდნენ და საავადმყოფოში გადაიყვანეს.

ამ დროისთვის პოლიცია შესაბამის ღონისძიებებს ახორციელებს.

სომხეთის საგამოძიებო კომიტეტში აცხადებენ, რომ გამოძიება დაიწყო სისხლის სამართლის კოდექსის 308-ე მუხლის პირველი ნაწილით, რაც ტერორიზმის ნიშნების შემცველ მოქმედებას გულისხმობს.