მედიის ცნობით, საგარეო და უსაფრთხოების საკითხებში ევროკავშირის უმაღლესი წარმომადგენელი, ჯოზეფ ბორელი აცხადებს, რომ უკრაინის ნატო-ში გაწევრიანება "ამ მომენტისთვის პრინციპულ საკითხს არ წარმოადგენს".

ბორელმა აღნიშნა, რომ ახლა მთავარია, უკრაინის სამხედრო მხარდაჭერა და რუსეთის წინააღმდეგ სანქციების გაგრძელება, რასაც, მისი შეფასებით, "ეფექტი აქვს".

ბორელის თქმით, ის მხარს უჭერს უკრაინის სამხედრო დახმარებას, დამატებით სანქციებს, არსებული სანქციების შენარჩუნებას და "მსოფლიო დიპლომატიურ ბრძოლაში მონაწილეობას, ვინაიდან რუსეთის წინააღმდეგ ყველა ქვეყანა არ მოქმედებს ერთნაირად ეფექტურად, ძლიერად და გადამწყვეტად".

ამასთან, ბორელმა აღნიშნა, რომ უკრაინაში რუსეთის შეჭრის გამო, ევროკავშირმა პირველად გამოიყენა თავისი სახსრები იარაღის შესაძენად და საომარ ვითარებაში მყოფი მესამე ქვეყნისთვის მისაწოდებლად.

„ამერიკის შეერთებული შტატების წვლილთან ერთად, ეს არის ის, რამაც საშუალება მისცა უკრაინას თავი დაეცვა“, – განაცხადა ბორელმა.

რაც შეეხება ბირთვული იარაღის გამოყენების მუქარას რუსეთის მხრიდან, ბორელმა განაცხადა, რომ "ყველა რისკი შესაძლებელია".

ევროკავშირის უმაღლესმა წარმომადგენელმა კომენტარი გააკეთა უკრაინაში კრემლის მხრიდან ე.წ. რეფერენდუმების გამართვაზეც და აღნიშნა, რომ "ამ ტერიტორიების ანექსიას არავინ აღიარებს". მისი თქმით, უკრაინის რეგიონების ანექსიის მცდელობა "ომის დასრულებას თითქმის შეუძლებელს ხდის".