მედიის ცნობით, რუსეთის ელჩი იაპონიის საგარეო საქმეთა სამინისტროში დაიბარეს
27 სექტემბერი, 2022
იაპონიის კონსულის, ტაჩუნორი მოტოკის ვლადივოსტოკში დაკავების გამო, რუსეთის ელჩი, მიხაილ გალუზინი იაპონიის საგარეო საქმეთა სამინისტროში დაიბარეს. შესაბამის ინფორმაციას იაპონური მედია ავრცელებს.
როგორც იაპონიის საგარეო საქმეთა სამინისტროში აცხადებენ, კონსულის დაკავება და საკონსულო ურთიერთობების შესახებ დაკითხვა ვენის კონვენციის აშკარა დარღვევაა. საგარეო საქმეთა მინისტრი, იოშიმასა ჰაიაში ამბობს, რომ კონსულის დაკავება უკანონო და აბსოლუტურად მიუღებელი ქმედება იყო, რადგან მას არანაირი უკანონობა არ ჩაუდენია.
რუსეთის უსაფრთხოების ფედერალურმა სამსახურმა იაპონელი დიპლომატის, ვლადივოსტკში იაპონიის გენერალური კონსულის, ტაჩუნორი მოტოკის დაკავების შესახებ ორშაბათს განაცხადა. რუსული სპეცსამსახურები კონსულს ჯაშუშობაში სდებენ ბრალს. რამდენიმე საათიანი დაკავების შემდეგ, დიპლომატი გაათავისუფლეს. ის "პერსონა ნონ გრატად" გამოაცხადეს და რუსეთის დასატოვებლად 48-საათიანი ვადა მისცეს.