რუსეთმა ვეტო დაადო გაერო-ს უშიშროების საბჭოს რეზოლუციას, რომელშიც მოსკოვის მიერ უკრაინის ოთხ ოლქში ჩატარებული რეფერენდუმი არალეგალურად არის აღიარებული.

მედიის ცნობით, რუსეთი ერთადერთი ქვეყანა იყო 15 წევრიან საბჭოში, რომელიც რეზოლუციის მიღების წინააღმდეგი გამოვიდა. ჩინეთმა, ინდოეთმა, ბრაზილიამ და გაბონმა ხმის მიცემისგან თავი შეიკავეს.

გაერო-ში უკრაინის მუდმივმა წარმომადგენელმა რეზოლუციის დაბლოკვას სამწუხარო ფაქტი უწოდა. მისი თქმით, გაერო-ს უშიშროების საბჭოში რუსეთის ყოფნა ხელს უშლის მის ფუნქციონირებას.

როგორც რეზოლუციის ინიციატორი ქვეყნის, აშშ-ის მუდმივმა წარმომადგენელმა, ლინდა ტომას გრინფილდმა განაცხადა, რუსეთის ვეტოს გამო აღნიშნული დოკუმენტი გაერო-ს 193 წევრიან გენერალურ ასამბლეაზე გავა, სადაც ვეტო არ არსებობს.

„ამ ნაბიჯით ჩვენ ვაჩვენებთ, რომ მსოფლიო კვლავ სუვერენიტეტისა და ტერიტორიული მთლიანობის დაცვის მხარესაა“, – განაცხადა აშშ-ის მუდმივმა წარმომადგენელმა გაერო-ში.