შტორმი „იდალია“, რომელიც ფლორიდას უახლოვდება, მეოთხე კატეგორიის ქარიშხალამდე გაძლიერდა და განსაკუთრებით საფრთხის შემცველია. ინფორმაციას უცხოური მედია საშუალებები აშშ-ის ქარიშხლების ეროვნულ ცენტრზე დაყრდნობით ავრცელებენ.

აშშ-ის ქარიშხლების ეროვნული ცენტრის ცნობით, აღნიშნულ შტორმს შესაძლებელია „კატასტროფული ზიანი“ მოჰყვეს. გავრცელებული პროგნოზის თანახმად, ქარიშხალი ფლორიდის სანაპიროს რამდენიმე საათში მიაღწევს, ამჟამად „იდალია“ ფლორიდის სანაპიროდან დაახლოებით 100 კილომეტრშია.

ფლორიდის 67 ოლქიდან 28-ში ევაკუაცია უკვე გამოცხადდა. გუბერნატორმა რონ დესანტისმა მოსახლეობა გააფრთხილა, რომ საშიში ზონები სასწრაფოდ დატოვონ.

მოსალოდნელი ქარის სიჩქარე საათში 215 კილომეტრია. აშშ-ის ქარიშხლების ეროვნულ ცენტრში არ გამორიცხავენ, რომ „იდალია“ კიდევ უფრო გაძლიერდეს, ვიდრე ფლორიდის ბიგ ბენდის რაიონს დაატყდება თავს. ცენტრის მიერ გამოქვეყნებულ გაფრთხილებაში ნათქვამია, რომ რეგიონს „კატასტროფული ტალღები და დამანგრეველი ქარი უახლოვდება“.