მედიის ინფორმაციით, ირანი ისრაელს შესაძლო „პრევენციული ზომების“ შესახებ აფრთხილებს.

„"წინააღმდეგობის ღერძის" მხრიდან პრევენციული ზომების შესაძლებლობა უახლოეს საათებშია მოსალოდნელი“, – განაცხადა ირანის საგარეო საქმეთა მინისტრმა, ჰოსეინ ამირ-აბდოლაჰიანმა სახელმწიფო ტელევიზიის ეთერში.

მანამდე, ამირ-აბდოლაჰიანმა განაცხადა, რომ „წინააღმდეგობის ლიდერები“ არ დაუშვებენ, რომ ისრაელმა ღაზაში ის აკეთოს, რაც სურს.

ისრაელსა და „ჰამასს“ შორის საომარი მოქმედებების დაწყების შემდეგ, თეირანმა არაერთხელ განაცხადა, რომ ღაზის სექტორში სახმელეთო ოპერაციას სხვა ფრონტებიდან რეაგირება მოჰყვება. აღსანიშნავია, რომ შაბათს ირანის საგარეო საქმეთა მინისტრი ისლამისტური მოძრაობა „ჰეზბოლას“ ლიდერს ჰასან ნასრალას შეხვდა.