მილანში 29 წლის ესპანელი ფეხბურთელი პაბლო მარი დაჭრეს, იტალიური მედიის ინფორმაციით, მისი მდგომარეობა კრიტიკულად მძიმეა.

პაბლო მარი სერია A-ს ბინადარ „მონცაში“ თამაშობს, თუმცა ლონდონის „არსენალს“ ეკუთვნის. ინციდენტი მილანის გარეუბანში სავაჭრო ცენტრთან მოხდა, პაბლო სავარაუდოდ, ფსიკიკური პრობლემების მქონე მამაკაცმა დანით დაჭრა.

46 წლის თავდამსხმელმა ფეხბურთელის გარდა კიდევ ოთხი ადამიანის დაჭრა. პაბლო მარის გარდა, ორის მდგომარეობა კრიტიკულად მძიმეა, ერთი კი გარდაიცვალა. პოლიციამ თავდამსხმელის დაკავება შეძლო.

მონცას ფეხბურთელი მილანოფიორიში სავაჭრო ცენტრში მეუღლესთან და შვილთან ერთად იმყოფებოდა. ფეხბურთელი ნიგუარდას ჰოსპიტალში გადაიყვანეს.

პოლიციის განცხადებით, 46 წლის მამაკაცი წლების განმავლობაში მკურნალობდა, მას მძიმე დეპრესიული კრიზისი ჰქონდა. თვითმხილველებმა განაცხადეს, რომ დანა, რომლითაც ოთხი ადამიანი დაჭრა, მაღაზიის თაროდან აიღო.

პაბლო მარი „მალიორკას“ აღზრდილია, 2016 წელს ის „მანჩესტერ სიტიმ“ გადაიბირა, თუმცა ძირითადად იჯარით სხვა კლუბებში თამაშობდა, შემდეგ ის ბრაზილიურ „ფლამენგოში“ გადავიდა, საიდანაც ისევ ინგლისში დაბრუნდა და „არსენალის“ ფეხბურთელი გახდა. ამ სეზონში მონცას რიგებში მას 8 თამაშში 1 გოლი აქვს გატანილი.