საზღვრის უკანონო კვეთის ეპიზოდზე მიხეილ სააკაშვილის პროცესი კიდევ ერთხელ გადაიდო. მიზეზი პენიტენციური სამსახურის ოქმი გახდა, რომლის მიხედვითაც, ჯანმრთელობის მდგომარეობის გამო, სააკაშვილს სხდომაზე დასწრება არ შეუძლია.

სასამართლოში მხოლოდ ექსპრეზიდენტის დაკითხვის ეტაპია დარჩენილი, რის მერეც განაჩენი უნდა გამოცხადდეს, თუმცა მისი დაკითხვა ამ დრომდე ვერ ხერხდება.

ადვოკატები ექსპერტების დასკვნას ელოდებიან, რის შემდეგაც აპირებენ სასამართლოს სასჯელის გადავადების შესახებ მიმართონ.

"ისე დაასრულა პროცესი მოსამართლემ, რომ ერთი სიტყვაც კი არ გვათქმევინა დაცვის მხარეს. ჩვენ უნდა წარგვედგინა სასამართლოსთვის ფორმა 100 და ასევე ჩვენი განცხადება, სადაც ვითხოვთ ცნობის გაცემას იმასთან დაკავშირებით თუ რამდენად აქვს შესაძლებლობა მიხეილ სააკაშვილს ჩვენება მისცეს მისი ჯანმრთელობის მდგომარეობიდან გამომდინარე. ფაქტი არის, რომ როგორც ჩანს, მათ არ აწყობთ, რომ საქმეში მოხდეს ინფორმაცია, რომელიც ადასტურებს, რომ მიხეილ სააკაშვილს რეალურად და ობიექტურად არ აქვს შესაძლებლობა ჩვენების მიცემის," - განაცხადა ადვოკატმა დიმიტრი საძაგლიშვილმა.

თავის მხრივ, პროკურორი განმარტავს, რომ მიხეილ სააკაშვილის მონაწილეობით შედგენილი ოქმის მიხედვით, ექსპრეზიდენტი მის გარეშე პროცესის ჩატარებაზე უარს აცხადებს.