მიხეილ სარჯველაძე - ყველას, ვისაც სურს, გახდეს სახალხო დამცველი, შესარჩევ პროცესში მონაწილეობის შესაძლებლობა ექნება, განაცხადების მიღება დღეს დაიწყო და იმედი მაქვს, შევძლებთ ყველაზე ოპტიმალური კანდიდატის არჩევას
15 სექტემბერი, 2022
პარლამენტის ადამიანის უფლებათა დაცვის კომიტეტის თავმჯდომარის მიხეილ სარჯველაძის განცხადებით, სახალხო დამცველის არჩევის მიზნით, კანდიდატად წარდგენის მსურველთა განაცხადების მიღება დღეს დაიწყო და ეს პროცესი 29 სექტემბრამდე გაგრძელდება.
მისივე თქმით, პრაქტიკულად სრული კონსენსუსით შეთანხმდნენ წესებთან დაკავშირებით, რომლის მიხედვითაც პროცედურები ჩატარდება.
„ეს გულისხმობს შეფასების, შერჩევის პროცესს პოლიტიკური სუბიექტების მხრიდან, კონსულტაციებს და ყველა დაინტერესებული მხარის ჩართულობას. ყველას, ვისაც სურვილი აქვს, გამოსცადოს საკუთარი შესაძლებლობა, რომ გახდეს სახალხო დამცველი, შესაძლებლობა ექნება, პროცესში მონაწილეობა მიიღოს. ყველას მიმართ ჩემი მოწოდებაა, ვინც მიიჩნევს, რომ შეუძლია, იყოს საქართველოს სახალხო დამცველი, წარმოადგინოს განაცხადი და გაიაროს პროცედურები, რომლის მეშვეობითაც მოხდება შეფასება და შემდგომ კანდიდატების შერჩევა. დიდი იმედი მაქვს, ყველაზე მეტად ოპტიმალური კანდიდატის არჩევას შევძლებთ“, – განაცხადა მიხეილ სარჯველაძემ.
ავტორი - თეონა მანაგაძე
