"მინდა განვაცხადო, რომ არასდროს არცერთი ჩემი ადვოკატისთვის არ მითქვამს, რომ ეჭვი მაქვს მოწამვლაზე. სპეკულაციები ამ თემაზე უადგილოა", - წერს საქართველოს მესამე პრეზიდენტი მიხეილ სააკაშვილი სოციალურ ქსელში.

მიუხედავად აღნიშნული განცხადებისა, მიხეილ სააკაშვილი წერს, რომ მისი ჯანმრთელობის მდგომარეობა ბოლო დროს განსაკუთრებით დამძიმდა.

დიდი მადლობა მინდა ვუთხრა სამედიცინო საზოგადოებას მხარდაჭერისთვის. ძალიან ვაფასებ მათ პროფესიულ თანადგომას. ჩემი ჯანმრთელობის მდგომარეობა მართლაც უარესდება და განსაკუთრებით დამძიმდა ამ ბოლო ორ თვეში. ვივამედის ექიმები მცდელობას არ აკლებენ. მნიშვნელოვანია, მივენდოთ სპეციალისტებს და ამ საკითხის ზედმეტი პოლიტიზება არ არის საჭირო. კიდევ ერთხელ დიდი მადლობა ყველას," - წერს სააკაშვილი

აღსანიშნავია, რომ ორი დღის წინ ექს-პრეზიდენტის ადვოკატმა ვალერი გელბახიანმა ჟურნალისტებთან განაცხადა, რომ მიხეილ სააკაშვილი მოწამლულია და ამას უცხოელი ექიმების დასკვნებიც მოწმობდა.

„უცხოელების ექსპერტიზის დასკვნაა. კვლევის ნაწილში არის მონაცემები თუ რა ელემენტები და ნაწილაკები ნახეს და რომელი მომწამლავი ნივთიერებისთვისაა დამახასიათებელი ეს ნაწილაკები. გამოკვლევის მთელი სერიაა", - განაცხადა გელბახიანმა.