21 აგვისტო, 2022

ჟურნალისტი და პოლიტოლოგი, დარია დუგინა, საზოგადო მოღვაწის, ალექსანდრე დუგინის ქალიშვილი, ავტომანქანის აფეთქებას ემსხვერპლა. შემთხვევა მოსკოვის რეგიონის სოფელ ბოლშიე ვიაზიომისთან მოხდა. ავტომობილი, რომელსაც დარია დუგინა მართავდა, მამამისს ეკუთვნოდა. ამის შესახებ სააგენტო ТАСС-ს დაღუპულის ახლობელმა, საზოგადოებრივი მოძრაობა „რუსული ჰორიზონტის“ ხელმძღვანელმა, ანდრეი კრასნოვმა განუცხადა.

კრასნოვის თქმით, დარია დუგინა ფესტივალ „ტრადიცია“-დან ბრუნდებოდა, სადაც ლიტერატურის, მუსიკის, კულტურისა და კინემატოგრაფიის სფეროში მიმდინარე აქტუალური ტენდენციები განიხილებოდა. კრასნოვის განცხადებით, რომელიც თავადაც ესწრებოდა ფესტივალს, ტრაგედია მოჟაისკის გზატკეცილზე, გადასახვევთან მოხდა. ასაფეთქებელი მოწყობილობა სოფელ ბოლშიე ვიაზიომისთან, დასახლებულ პუნქტან ახლოს გააქტიურდა. მანქანას, რომელსაც დარია დუგინა მართავდა, ცეცხლი მაშინვე გაუჩნდა. დარიამ მართვაზე კონტროლი დაკარგა, რის შედეგადაც მანქანა გზის მოპირდაპირე მხარეს დიდი სისწრაფით გადავიდა.

კრასნოვმა დასძინა, რომ მანქანა დარიას მამას, ალექსანდრე დუგინს ეკუთვნოდა. დუგინმა ფესტივალი სხვა მანქანით დატოვა, რის შემდეგაც ტრაგედიის ადგილზე მივიდა. კრასნოვი ვარაუდობს, რომ თავდამსხმელების სამიზნე იყო ან ალექსანდრე დუგინი, ან დუგინი თავის ქალიშვილთან ერთად. საზოგადოებრივი მოძრაობის „რუსული ჰორიზონტის“ ხელმძღვანელის თქმით, აფეთქება ფესტივალის ავტოსადგომზე რომ მომხდარიყო, შედეგები ბევრად უფრო მძიმე იქნებოდა.

დარია დუგინა 1992 წელს დაიბადა. დაამთავრა ლომონოსოვის სახელობის მოსკოვის სახელმწიფო უნივერსიტეტის ფილოსოფიის ფაკულტეტი, ფლობდა ფილოსოფიის მეცნიერებათა კანდიდატის ხარისხს.