ხვიჩა კვარაცხელიას „ნაპოლი“ ჩემპიონთა ლიგაზე გლაზგოს „რეინჯერსის“ წინააღმდეგ გასამართი შეხვედრისთვის ემზადება. მოახლოებული მატჩის წინ გამოცემა Heraldscotland გლაზგოური კლუბის ვეტერან იტალიელ ფეხბურთელს მარკო ნეგრის ესაუბრა.

მარკო ნეგრიმ მედიასაშუალებასთან საუბრისას ხვიჩა კვარაცხელიაზეც ისაუბრა და აღნიშნა, რომ შოტლანდიური კლუბისთვის მთავარ საფრთხეს სწორედ ქართველი ფეხბურთელი წარმოადგენს.

„ის დიდებული ფეხბურთელია, ნამდვილი მონსტრი. ჯერ კიდევ ძალიან ახალგაზრდაა, თუმცა, ასეთი გავლენის მოხდენა შეუძლია. ფეხებზე კარგად დგას, მაგრად დარბის და ზუსტად ურტყამს. მსოფლიოში რამდენიმე ფეხბურთელია, რომლებიც მეტოქე გუნდის მწვრთნელებს აიძულებენ ტაქტიკა შეცვალონ, რათა მათთან გამკლავება შეძლონ. კვარაცხელია მათგან ერთ-ერთია“, - განაცხადა ნეგრიმ.

უნდა აღნიშნოს, რომ ნეგრის კერპი დიეგო მარადონაა და არაერთხელ აქვს ნათქვამი, რომ ფეხბურთის თამაში სწორედ არგენტინელი ლეგენდის გამო დაიწყო. ცნობილია რომ ქართველ ტალანტს იტალიაში მალევე “კვარადონა” შეარქვეს და ნეგრიმ ამ საკითხზეც ისაუბრა.

„ჩემთვის სრულიად გასაგებია, რატომ თვლიან, რომ კვარაცხელიას შეუძლია იმავე სიმაღლეებს მიაღწიოს, რასაც მარადონამ“, - აღნიშნა ვეტერანმა ფეხბურთელმა.

„ნაპოლისა“ და „რეინჯერსის“ დაპირისპირება 26 ოქტომბერს იტალიაში, სტადიო მარადონაზე გაიმართება. ამ დროისთვის, ჩემპიონთა ლიგის A ჯგუფს სწორედ ნეაპოლელები ლიდერობენ მაქსიმალური 12 ქულით, გლაზგოელებს კი ქულა არ აქვთ და ბოლო ადგილზე არიან. 21 წლის კვარაცხელიას მიმდინარე სეზონში ყველა ტურნირზე ერთად 7 გოლი და 6 საგოლე პასი აქვს, მან ასევე თავი 3 მოპოვებული პენალტითა გამოიჩინა.