იტალიურმა "ნაპოლიმ", სადაც ქართველი შემტევი ხვიჩა კვარაცხელია ასპარეზობს იტალიის ჩემპიონატში მორიგი გამარჯვება იზეიმა. "სასუოლოს" წინააღმდეგ კვარაცხელიამ ერთი გოლის გატანა და ორი საგოლე გადაცემის შესრულება შეძლო.

სერია A-ს მე-12 ტურის შეხვედრა ლუჩანო სპალეტის გუნდმა აქტიურად დაიწყო, რასაც კვარაცხელიას გადაცემებით ნიგერიელი ვიქტორ ოსიმენის დუბლი მოჰყვა. პირველ ჯერზე შეტევის მარჯვენა ფლანგიდან საჯარიმოში ჯოვანი დი ლორენცომ ჩააწოდა და ბურთი სანამ ნიგერიელთან აღმოჩნდებოდა, თავით ჯერ ხვიჩა შეეხო, შეტევა კი სწორედ ოსიმენმა დაასრულა. მეორე გოლის მომენტში 21 წლის ქართველმა ნახევარმცველმა სტუმართა გერმანელი მცველი იერემი ტოლიანი მარტივად ჩამოიშორა და კარის წინ მყოფ ვიქტორს დაუგორა, რომელსაც გატანა აღარ გასჭირვებია.

სერია A-ში უკვე მე-6 გოლი კვარაცხელიამ მარიუ რუის მაღალი ჩაწოდების შემდეგ გაიტანა - ბურთი ოსტატურად ჩამოიღო და ახლო კუთხეში უძლიერესად დაარტყა.

კვარაცხელია შესვენების შემდეგაც აქტიური იყო, თუმცა შედეგიანი მოქმედებით აღარ გამორჩეულა. 61-ე წუთზე ქართველზე "სასუოლოს" მცველმა იუხეშა. ნაპოლის ექიმებმა ქართველ შემტევს დახმარება აღმოუჩინეს და კვარაცხელიამ თამაში გააგრძელა. მიუხედავად ამისა, ცოტა ხნის შემდეგ სპალეტიმ მისი შეცვლა მაინც გადაწყვიტა.

დარჩენილ დროში ვიქტორ ოსიმენმა მესამედაც გაიტანა და საბოლოო ანგარიში დააფიქსირა (4:0), სტუმრები კი მატჩის მიწურულს 10 კაცით დარჩნენ - არბიტრმა "სასუოლოს" შემტევი არმან ლორენტე გააძევა.

ლუჩანო სპალეტის გუნდმა იტალიის ჩემპიონატის 12 მატჩში 32 ქულა მოაგროვა და სატურნირო ცხრილს ერთპიროვნულად ლიდერობს. მეორე ადგილზე 26 ქულით მილანია, რომელსაც თამაშით ნაკლები აქვს ჩატარებული. სერია A-ს მომდევნო ტურში ნაპოლი ატალანტას სტუმრობს (5 ნოემბერს), მანამდე კი ჩემპიონთა ლიგის A ჯგუფში ბოლო ტურის შეხვედრას სტუმრად "ენფილდზე" ლივერპულთან გამართავს (2 ნოემბერს).