სამხრეთ კავკასია არ უნდა იქცეს არარეგიონული ძალების გეოპოლიტიკური კონკურენციის ასპარეზად, – ამის შესახებ ირანის საგარეო საქმეთა სამინისტროს პრესსპიკერმა, ნასერ ყანაანიმ განაცხადა.

ირანის საგარეო საქმეთა სამინისტროს წარმომადგენელმა ქვეყნის პოზიცია სამხრეთ კავკასიის რეგიონთან დაკავშირებით სომხეთს, აშშ-ს და ევროკავშირს შორის სამმხრივ შეხვედრაზე დასმული კითხვის პასუხად განმარტა.

ნასერ ყანაანიმ კავკასიაში მშვიდობისა და სტაბილურობის დასამყარებლად რეგიონული თანამშრომლობის მნიშვნელობაზე ისაუბრა. ირანელი დიპლომატის განცხადებით, ეკონომიკური თანამშრომლობის გაძლიერება და კომუნიკაციის გაფართოება ეფექტურ როლს თამაშობს კავკასიის რეგიონში მშვიდობის, სტაბილურობის დამყარებაში და ეკონომიკურ განვითარებაში.

ირანის საგარეო საქმეთა სამინისტროს პრესსპიკერმა ასევე ისაუბრა არსებული დავების გადასაწყვეტად რეგიონული შესაძლებლობების - მათ შორის 3+3 საკონსულტაციო მექანიზმის - გამოყენების აუცილებლობაზე.