ნატო-ს ცხრა წევრი ქვეყნის პრეზიდენტები, ალიანსში უკრაინის გაწევრიანების შესახებ, ერთობლივ განცხადებას ავრცელებენ.

"ჩვენ, ცენტრალური და აღმოსავლეთ ევროპის ქვეყნების პრეზიდენტები, ვინც კიევს ომის დროს ვეწვიეთ და რუსული აგრესიის შედეგები საკუთარი თვალით ვიხილეთ, არ შეგვიძლია გავჩუმდეთ რუსეთის ფედერაციის მიერ საერთაშორისო სამართლის უხეშ დარღვევაზე და ამიტომ, შემდეგ ერთობლივ განცხადებას ვაქვეყნებთ:

ჩვენ კიდევ ერთხელ მტკიცედ გამოვხატავთ ჩვენს მხარდაჭერას უკრაინის სუვერენიტეტისა და ტერიტორიული მთლიანობის მიმართ და არასოდეს არ ვაღიარებთ რუსეთის მიერ უკრაინის რომელიმე ტერიტორიის ანექსიის მცდელობას.

ჩვენ მტკიცედ ვდგავართ 2008 წლის ბუქარესტის ნატო-ს სამიტის გადაწყვეტილების უკან, უკრაინის მომავალ წევრობასთან დაკავშირებით.

ჩვენ მხარს ვუჭერთ უკრაინას რუსეთის შემოჭრისგან თავდაცვაში, მოვითხოვთ რუსეთისგან, რომ დაუყონებლივ გაიყვანოს ჯარი ყველა ოკუპირებული ტერიტორიიდან და მოვუწოდებთ ყველა მოკავშირეს, არსებითად გაზარდონ უკრაინის სამხედრო დახმარება.

ყველა, ვინც აგრესიის დანაშაულს ჩაიდენს, პასუხი უნდა აგოს და დაისაჯოს", - ნათქვამია ერთობლივ განცხადებაში.

აღნიშნულ განცხადებას ხელს აწერენ: ჩეხეთის პრეზიდენტი - მილოშ ზემანი, ესტონეთის პრეზიდენტი - ალარ კარისი, ლატვიის პრეზიდენტი - ეგილს ლევიტსი, ლიეტუვას პრეზიდენტი - გიტანას ნაუსედა, ჩრდილოეთ მაკედონიის პრეზიდენტი - სტევო პენდაროვსკი, მონტენეგროს პრეზიდენტი - მილო ჯუკანოვიჩი, პოლონეთის პრეზიდენტი - ანჯეი დუდა, რუმინეთის პრეზიდენტი - კლაუს იოჰანისი, სლოვაკეთის პრეზიდენტი - ზუზანა ჩაპუტოვა.