ჩრდილოატლანტიკური ხელშეკრულების ორგანიზაციის (NATO) გენერალური მდივნის პირადი ოფისის დირექტორმა, სტიან იენსენმა განაცხადა, რომ ნატო-ში გაწევრიანება უკრაინამ შეიძლება რუსეთისთვის გარკვეული ტერიტორიის დათმობის სანაცვლოდ მოიპოვოს. მისივე თქმით, ეს შეიძლება უკრაინაში ომის დასრულების ნაწილიც იყოს. ინფორმაციას ამის შესახებ ნორვეგიული გაზეთი Verdens Gang-ი (VG) ავრცელებს.

„ვფიქრობ, გამოსავალი შეიძლება იყოს უკრაინის ტერიტორიის ნაწილის დათმობა და სანაცვლოდ ნატო-ს წევრობის მიღება“, - აღნიშნა სტიან იენსენმა არენდალში გამართული დებატების ფარგლებში.

სტიან იენსენის თქმით, ნატო-ს გენერალურმა მდივანმა არაერთხელ განაცხადა, რომ ოკუპაციის დასრულების მიზნით რუსეთთან ნებისმიერი მოლაპარაკების დრო და პირობები უკრაინის გადასაწყვეტია.

მისივე განცხადებით, რუსეთს სამხედრო თვალსაზრისით სირთულეები აქვს და ის, რომ მათ ახალი ტერიტორიების დაპყრობა შეძლონ, ამ ეტაპზე არარეალურად ჩანს, თუმცა, ახლა უფრო საკითხავია, რის დაბრუნებას მოახერხებს უკრაინა.

კითხვაზე, მიიჩნევს თუ არა ნატო, რომ უკრაინამ უნდა დათმოს ტერიტორიის ნაწილი, რათა რუსეთთან მშვიდობას და ნატო-ში მომავალ წევრობას მიაღწიოს, იენსენმა აღნიშნა, რომ ომის შემდგომ შესაძლო სტატუსის შესახებ დისკუსიები უკვე მიმდინარეობს და რუსეთისთვის ტერიტორიის დათმობის შესახებ კითხვებს სხვები სვამენ.

„არ ვამბობ, რომ ასე უნდა იყოს. მაგრამ ეს შეიძლება იყოს შესაძლო გამოსავალი“, - დასძინა ნატოს გენერალური მდივნის პირადი ოფისის დირექტორმა.