სომხეთის პრემიერ-მინისტრის, ნიკოლ ფაშინიანის განცხადებით, "აზერბაიჯანის ეთნიკური წმენდის პოლიტიკის შედეგად სომხების გამოსვლა მთიანი ყარაბაღიდან გრძელდება". ამის შესახებ მან სომხეთის მთავრობის სხდომაზე 28 სექტემბერს განაცხადა.

„სიტუაციის ანალიზი აჩვენებს, რომ უახლოეს დღეებში მთიან ყარაბაღში არცერთი სომეხი აღარ დარჩება. ეს არის პირდაპირი ეთნიკური წმენდისა და სამშობლოს ჩამორთმევის აქტი, რის შესახებაც დიდი ხანია ვეუბნებით საერთაშორისო საზოგადოებას. სხვადასხვა საერთაშორისო მოთამაშეების განცხადებები, რომლებიც გმობენ მთიან ყარაბაღში მიმდინარე ეთნიკურ წმენდას, მნიშვნელოვანია, მაგრამ თუ მათ არ მოჰყვება კონკრეტული ქმედებები, მაშინ ისინი განიხილება მხოლოდ ისტორიისთვის მორალური სტატისტიკის შექმნის ნაწილად“, - განაცხადა ფაშინიანმა.

არსებული მონაცემებით, ყარაბაღი უკვე 65 000-ზე მეტმა ადამიანმა დატოვა.

შეგახსენებთ, რომ 28 სექტემბერს სამველ შაჰრამანიანმა ხელი მოაწერა განკარგულებას, რომლის თანახმადაც მთიანი ყარაბაღის არაღიარებული რესპუბლიკა არსებობას 2024 წლის 1 იანვრიდან წყვეტს.