სომხეთის პრემიერ-მინისტრის, ნიკოლ ფაშინიანის თქმით, ერევანმა ბაქოს სამშვიდობო შეთანხმების ახალი წინადადებები გადაუგზავნა. ამის შესახებ განაცხადება სომხეთის მთავრობის მეთაურმა 24 აგვისტოს გამართულ სხდომაზე გააკეთა.

„მინდა, დავადასტურო, რომ სომხეთი მშვიდობიანი დღის წესრიგის ერთგულია. მინდა, გაცნობოთ, რომ ჩვენ აზერბაიჯანულ მხარეს ახალი წინადადბები გავუგზავნეთ, რომლებიც სომხეთსა და აზერბაიჯანს შორის სამშვიდობო შეთანხმებას ეხება“, – განაცხადა ფაშინიანმა.

მან ასევე აღნიშნა, რომ მთიანი ყარაბაღის კონფლიქტის ზონაში ვითარება კვლავაც დაძაბულია.

„ერთადერთი ცვლილება სიტუაციაში არის ის, რომ წითელი ჯვრისა და რუსი სამშვიდობოების მეშვეობით ლაჩინის დერეფანში სხვა პირებთან ერთად დაიწყო იმ მოქალაქეების მოძრაობა, რომლებსაც მკურნალობა სჭირდებათ. ჩვენ ასევე გვაქვს დადასტურებული ინფორმაცია, რომ მუშავდება ლაჩინის დერეფნის ცალმხრივად გახსნის გეგმა, ანუ მთიან ყარაბაღში ჩასვლა დაშვებული იქნება, მაგრამ გამოსვლა – არა.

ცნობისთვის, ლაჩინის დერეფანი ერთადერთი გზაა, რომლითაც ყარაბაღი სომხეთს უკავშირდება. სომხეთის ხელისუფლება დერეფნის ჩაკეტვაში ბაქოს ადანაშაულებს, რასაც აზერბაიჯანი უარყოფს.

მანამდე, 16 თებერვალს, ნიკოლ ფაშინიანმა განაცხადა, რომ სომხეთმა ბაქოსთან სამშვიდობო შეთანხმებაზე მუშაობის მორიგი ეტაპი დაასრულა და ახალი წინადადებები აზერბაიჯანის მთავრობას გადაეგზავნა.