ნიკოლ ფაშინიანი აცხადებს, რომ უსაფრთხოების სფეროში სომხეთის მხოლოდ რუსეთზე დამოკიდებულება სტრატეგიული შეცდომა იყო. სომხური მედიის ცნობით, ეს განცხადება სომხეთის პრემიერ-მინისტრმა იტალიურ მედიასთან ინტერვიუში გააკეთა.

მისივე თქმით, ქვეყანა ცდილობს, უსაფრთხოების სფეროში პოლიტიკის დივერსიფიცირება მოახდინოს.

"სომხეთის უსაფრთხოების არქიტექტურა 99.99%-ის რუსეთთან იყო დაკავშირებული, მათ შორის იარაღისა და საბრძოლო მასალების შეძენის კუთხითაც. ახლა, როდესაც რუსეთს თავად ესაჭიროება იარაღიც და საბრძოლო მასალებიც, ცხადია, რომც უნდოდეს, მაინც ვერ დააკმაყოფილებს უსაფრთხოების სფეროში სომხეთის საჭიროებას. ამ მაგალითმა უნდა გვაჩვენოს, რომ უსაფრთხოების სფეროში ერთ ცენტრზე მიბმა ან დამოკიდებულება თავისთავად სტრატეგიული შეცდომაა. მხოლოდ მას შემდეგ, რაც უკვე ვიგემეთ ამ შეცდომის მწარე ნაყოფი, ვცდილობთ, უსაფრთხოების სფეროში ჩვენი პოლიტიკის დივერსიფიცირება მოვახდინოთ", – განაცხადა ფაშინიანმა.

პრემიერის თქმით, რუსი პარტნიორები სომხურ მხარეს ეუბნებიან, რომ დასავლეთის ქვეყნები სომხეთთან მუშაობენ და ქვეყნის მთავრობას უბიძგებენ, მიიღონ ზომები რუსეთის რეგიონიდან გასაძევებლად.

"მაგრამ, ჩვენს რუს პარტნიორებთან საუბრისას, ხანდახან გამოვთქვამთ ჩვენს აზრს და შეფასებას, რომ პირიქით, ვხედავთ, რომ თავად რუსეთი ტოვებს რეგიონს იმ ნაბიჯების გათვალისწინებით, რომელსაც ის დგამს ან არ დგამს. რა მიზეზით ხდება ეს, ჩვენ არ ვიცით. მე შემიძლია, კომენტარი გავაკეთო, მაგრამ მტკიცებით ვერაფერს ვიტყვი“, – განაცხადა ფაშინიანმა.