21 სექტემბერი, 2022

კომპიუტერული მოწყობილობების მწარმოებელმა უმსხვილესმა ამერიკულმა კომპანია Nvidia-მ ახალი თაობის უმძლავრესი ვიდეობარათები (GPU) წარადგინა. RTX 40 სერიაში კომპანიის ორი ახალი პროდუქტი 4080 და ფლაგმანი 4090 იქნება, რომელიც წინამორბედ RTX 3090-თან შედარებით 4-ჯერ უფრო მძლავრი და სწრაფია. Nvidia-ს განმარტებით, ადა ლავლეისის სახელწოდების არქიტექტურაზე აგებული 40 სერია „კვანტური ნახტომი“ იქნება გეიმინგ ინდუსტრიაში, რომელიც მოთამაშეებს არნახულ შესაძლებლობებს მისცემს. გარდა გაზრდილი ტექნიკური შესაძლებლობებისა, Nvidia-ს ახალი ვიდეობარათები DLSS 3 ფუნქციას მიიღებენ, რომელიც ხელოვნური ინტელექტის დახმარებით მნიშვნელოვნად ზრდის ვიდეობარათების წარმადობას. ცნობისთვის, Nvidia-ს ვიდეობარათები არა მხოლოდ კომპიუტერული თამაშებისთვის, არამედ ისეთი ინტენსიური საქმიანობისთვისაც გამოიყენება, როგორიცაა: კრიპტოვალუტის მაინინგი, მონტაჟი და გამოთვლები. შეგახსენებთ, რომ Nvidia მსოფლიოს რიგით მე-18 უმსხვილესი კომპანიაა - მისი საბაზრო კაპიტალიზაცია ამჟამად 329 მილიარდ დოლარს შეადგენს, ვიდეობარათები კი კომპანიის მთავარი შემოსავლის წყაროა.

ავტორი - გიორგი თოლორდავა