OPEC-მა შესაძლოა მიწოდება შეამციროს - რატომ იზრდება ბირჟაზე ნავთობის ფასები
25 აგვისტო, 2022
საუდის არაბეთის ენერგეტიკის მინისტრის განცხადებით, ნავთობის ექსპორტიორმა ქვეყნებმა და მათმა მოკავშირეებმა (OPEC+), შესაძლოა, ნავთობის მიწოდება შეამცირონ.
ამ განცხადების შემდეგ, როგორც მოსალოდნელი იყო, საერთაშორისო ბირჟაზე ნედლი ნავთობის ფასებმა ზრდა დაიწყო. ახლა Brent-ის ტიპის ნავთობის ღირებულება, რომელიც აგვისტოში ბარელზე 92 დოლარამდე იყო შემცირებული, 101.8 დოლარიან ნიშნულს დაუბრუნდა, 86 დოლარამდე შემცირებული WTI-ის ტიპის ნედლი ნავთობი კი 95.3 აშშ დოლარი ღირს.
მიწოდების შესაძლო შემცირების დაანონსების მთავარი მიზანი სწორედ შემცირებული ფასების კორექტირება იყო, რადგან ნავთობზე გაზრდილი მოთხოვნის პირობებში, რამდენით ან საერთოდ შეამცირებს თუ არა OPEC+ მიწოდებას, ჯერ კვლავ გაურკვეველია.
როგორც OPEC-ის წარმომადგენლებმა Reuters-ს განუცხადეს, მიწოდების ნებისმიერი შემცირება, სავარაუდოდ, ირანის ნავთობის ბაზარზე დაბრუნებას დაემთხვევა იმ შემთხვევაში, თუკი ბირთვული შეთანხმება მიღწეული იქნება.
დისკუსია ირანთან ბირთვული შეთანხმების მიღწევაზე კვლავ დაპაუზებულია, რაც ქვეყნიდან ნავთობის ექსპორტის განახლებას ბუნდოვანს ხდის.
ფასების აღმასვლაზე გავლენა იქონია აშშ-ს ნედლი ნავთობისა და პროდუქტების მარაგების შემცირებამაც.
მიუხედავად აშშ-ს პრეზიდენტის, ჯო ბაიდენის საუდის არაბეთში ვიზიტისა და დასავლეთის მცდელობისა, OPEC-ი წარმოების გაზრდას სექტემბრიდან უმნიშვნელოდ, დღეში მხოლოდ 100,000 ბარელით დათანხმდა.
კახი ჩაკვეტაძე ავტორი:
