ორბანი - უნგრეთს აქვს გეგმა იმ შემთხვევისთვის, თუ ევროკავშირი ქვეყანას კუთვნილ ფულს არ მისცემს
26 სექტემბერი, 2022
თუ ბრიუსელი უარს იტყვის უნგრეთისთვის მისი კუთვნილი ფულადი სახსრების გამოყოფაზე, ბუდაპეშტი საჭირო თანხას სხვა წყაროებიდან მიიღებს, მოლაპარაკებები უკვე დაწყებულია. ამის შესახებ უნგრეთის პრემიერ-მინისტრმა, ვიქტორ ორბანმა პარლამენტის სხდომაზე განაცხადა.
"თუ ბიუროკრატები ბრიუსელში კვლავ უარს იტყვიან ქვეყნისთვის მისი კუთვნილი ფულის მიცემაზე, მაშინ ჩვენ საჭირო თანხას სხვა ფინანსური წყაროებიდან მივიღებთ. ჩვენ უკვე დავიწყეთ ამაზე მოლაპარაკებები ევროკავშირთან და ჩვენს სხვა საერთაშორისო პარტნიორებთან", - განაცხადა ორბანმა.
მანამდე ევროკომისიამ ევროკავშირის საბჭოს შესთავაზა ევროკავშირის ბიუჯეტში უნგრეთთან მიმართებაში პირობითობის მექანიზმის შემოღება. ეს ბუდაპეშტისთვის ევროკავშირის დაფინანსებიდან 7,5 მილიარდამდე ევროს გაყინვას ნიშნავს. ევროკავშირის ისტორიაში ეს პირველი შემთხვევა იქნება მას მერე, რაც ორი წლის წინ, ევროკავშირის ბიუჯეტის კორუფციისგან დასაცავად, პირობითობის მექანიზმი შეიქმნა.
ევროკავშირის საბჭოს ახლა ერთი თვე აქვს იმისთვის, რომ კვალიფიციური უმრავლესობით გადაწყვიტოს, განახორციელოს თუ არა მსგავსი ქმედება. გამონაკლის შემთხვევაში, ეს ვადა შეიძლება მაქსიმუმ ორი თვით გაგრძელდეს.