უნგრეთის პრემიერ-მინისტრის, ვიქტორ ორბანის განცხადებით, მან პრაღის სამიტზე ევროკავშირის ლიდერებს მოლაპარაკებების გამართვისკენ მოუწოდა, იმის თაობაზე, რომ უკრაინის კონფლიქტის გაფართოება არ მოხდეს. ორბანმა ასევე აღნიშნა, რომ რუსეთის წინააღმდეგ სანქციების მერვე პაკეტის დამტკიცების დროს, უნგრეთმა ეროვნული ინტერესები დაიცვა, რათა სანქციები უნგრეთისთვის მნიშვნელოვან ენერგეტიკის სფეროს არ შეხებოდა.

"პრაღაში დასრულდა პრემიერ-მინისტრების სამიტი. ჩვენ ორი უმნიშვნელოვანესი საკითხი განვიხილეთ... მე უნგრეთის პოზიციას ვიცავდი, რომ მთავარია მშვიდობა და ესკალაციის თავიდან აცილება. ამ დროისთვის მოვლენები ამ მიმართულებით ვითარდება, მაგრამ ჩვენ ცეცხლის შეწყვეტა და მოლაპარაკებები გვჭირდება. მე ევროკავშირის უდიდესი სახელმწიფოების ლიდერებს ვთხოვე, ყველა ეცადოს მოლაპარაკებას, რათა ომის გავრცელება თავიდან ავიცილოთ", - განაცხადა ორბანმა სოციალურ ქსელში გავრცელებულ მიმართვაში.

მისივე განმარტებით, მეორე საკითხი ენერგეტიკას შეეხებოდა.

"რაც შეეხება ენერგეტიკას, აქ შევძელით ჩვენი ქვეყნისთვის მნიშვნელოვანი ეროვნული მიზნების მიღწევა. ჩვენ გავთავისუფლდით [სანქციების] მერვე პაკეტის ჩვენთვის ძალიან მტკივნეული პუნქტებისგან. სანქციების ეს პაკეტი არ გავრცელდება არც უნგრეთისთვის გაზის მიწოდებაზე, არც ატომურ ელექტროსადგურზე და გარდა ამისა, უფლებას უტოვებს უნგრეთს შეუფერხებლად განაგრძოს ატომური ელექტროსადგურის "პაკშ-2"-ის მშენებლობა. ჩვენ ევროკომისიას მოვუწოდეთ, დაუყოვნებლივ მიიღონ ზომები ენერგორესურსების ფასების შემცირებასთან დაკავშირებით, ვინაიდან, [რუსეთის წინააღმდეგ დაწესებულმა] სანქციებმა ევროპაში ფასების უზარმაზარი ზრდა გამოიწვია", - აღნიშნა ვიქტორ ორბანმა.