26 სექტემბერი, 2022

ევროპაში ენერგორესურსებზე ფასების ზრდა და ინფლაცია მხოლოდ ბრიუსელის სანქციების შედეგია. მაღალი ფასების მიზეზები პოლიტიკურია და არა ეკონომიკური, - განაცხადა უნგრეთის პრემიერ-მინისტრმა, ვიქტორ ორბანმა.

"ყველა ეკონომიკური უბედურების მიზეზი ბრიუსელის პასუხია, ვგულისხმობ, სანქციებს. სწორედ მათ გამოა, რომ ენერგორესურსებზე ფასი რამდენჯერმე გაიზარდა. ენერგორესურსებზე ფასის ზრდამ ყველა ქვეყანაში ინფლაციის გაზრდა გამოიწვია. ეს საშინელი ფასები არ არის ეკონომიკური პროცესების შედეგი. ენერგიაზე ფასების უზარმაზარი ზრდა ცალსახად სანქციებით არის გამოწვეული. შესაბამისად, ენერგიაზე ფასების ზრდაზე პასუხისმგებლობა ეკისრება არა ეკონომიკურ, არამედ - პოლიტიკურ პროცესებს, კერძოდ კი - ბრიუსელის გადაწყვეტილებებს", - ამის შესახებ ორბანმა უნგრეთის პარლამენტში სიტყვით გამოსვლისას განაცხადა.

"ჩვენ თამამად შეგვიძლია ვთქვათ, რომ სანქციების შედეგად, ევროპელი ხალხი უფრო გაღარიბდა, რუსეთი კი მუხლებზე ჯერ არ დაცემულა. ამ იარაღმა უკუეფექტი მოგვცა. მთელი ევროპა ელოდება პასუხს ბრიუსელისგან, თუ რამდენ ხანს უნდა გავაგრძელოთ ამის კეთება“, - განაცხადა ორბანმა.

მისი თქმით, დროა სანქციების საკითხი აშშ-თანაც განიხილონ.