ევროკავშირი რუსეთიდან გათხევადებული აირის რეკორდული რაოდენობის იმპორტს ახორციელებს. ამის შესახებ გამოცემა „ფაინენშალ თაიმსი“ წერს.

მედიასაშუალების ცნობით, მიუხედავად იმისა, რომ ევროკავშირი 2027 წლისთვის რუსულ წიაღისეულ საწვავზე უარის თქმისკენ მიისწრაფვის, წელს ბლოკი რუსეთისგან გათხევადებული ბუნებრივი აირის რეკორდულ მოცულობას შეიძენს.

როგორც გამოცემა წერს, არასამთავრობო ორგანიზაციის, Global Witness-ის მიერ ჩატარებული დარგის მონაცემების ანალიზის თანახმად, მიმდინარე წლის პირველი შვიდი თვის განმავლობაში, რუსული გათხევადებული აირის რიგით მეორე და მესამე უმსხვილესი იმპორტიორები - ჩინეთის შემდეგ - ბელგია და ესპანეთი იყვნენ.

„ფაინენშალ თაიმსის“ ინფორმაციით, ევროკავშირის მიერ გათხევადებული აირის იმპორტი მიმდინარე წლის იანვრიდან ივლისამდე 40%-ით არის გაზრდილი 2021 წლის ამავე პერიოდთან, ანუ უკრაინაში რუსეთის ფართომასშტაბიან ინტერვენციამდე პერიოდთან შედარებით. გამოცემის ცნობით, მკვეთრი ზრდა განპირობებულია იმით, რომ ევროკავშირი ომამდე გათხევადებული აირის დიდ რაოდენობას არ ყიდულობდა, ვინაიდან, რუსეთიდან მილსადენებით მიწოდებულ ბუნებრივ აირზე იყო დამოკიდებული.

„შოკისმომგვრელია, რომ ქვეყნები ევროკავშირში ამდენს მუშაობდნენ, რათა უარი ეთქვათ მილსადენით მიწოდებულ რუსულ გაზზე მხოლოდ იმისთვის, რომ ის ტრანსპორტირებულით ჩაენაცვლებინათ. არ აქვს მნიშვნელობა, მას მილსადენით თუ ხომალდით მიიღებ – ეს მაინც ნიშნავს, რომ ევროპული კომპანიები მილიარდებს აგზავნიან პუტინის ომის სკივრში“, – განაცხადა Global Witness წარმომადგენელმა, ჯონათან ნორონია-განტმა.