ირანის აიათოლა ალი ხამენეიმ ისრაელი გააფრთხილა, რომ ღაზის სექტორზე თავდასხმები პალესტინელი ხალხის გენოციდს წარმოადგენს და მუსლიმები წინააღმდეგობას გააგრძელებენ.

"ვერავინ შეძლებს შეაჩეროს ისრაელისადმი წინააღმდეგობა პალესტინაში, თუ ებრაული სახელმწიფო ღაზის სექტორის მასიურ და განურჩეველ დაბომბვას გააგრძელებს", - განაცხადა ირანის სულიერმა ლიდერმა.

"თუ სიონისტური რეჟიმის დანაშაულებები გაგრძელდება, მუსლიმები მთელს მსოფლიოში და წინააღმდეგობის ძალები მოთმინებას დაკარგავენ. მაშინ მათ ვერავინ შეაჩერებს", - დასძინა მან. აიათოლა ალი ხამენეის სიტყვებს სააგენტო IRNA ავრცელებს.

ალი ხამენეიმ ასევე ისაუბრა ისრაელის „სიონისტური რეჟიმის“ პასუხისგებაში მიცემისა და ღაზის სექტორის დაბომბვის დაუყონებლივ შეწყვეტის აუცილებლობის შესახებ.

ვითარება ისრაელსა და "ჰამასს" შორის 7 ოქტომბრის თავდასხმის შემდეგ დაიძაბა. „ჰამასმა“ ისრაელზე მასშტაბური თავდასხმა განახორციელა, რის შემდეგაც ისრაელმა საპასუხოდ ღაზის სექტორში საჰაერო ოპერაცია დაიწყო. ბოლო მონაცემებით, ისრაელში „ჰამასის“ თავდასხმას 1 400-ზე მეტი ადამიანი ემხვერპლა, ისრაელის ავიადარტყმების შედეგად ღაზის სექტორში 2 700-ზე მეტი ადამიანი დაიღუპა.