იტალიურმა „ნაპოლიმ“ ჩემპიონთა ლიგის მე-5 ტურში გლაზგოს „რეინჯერსი“ 3-ბურთიანი სხვაობით (3:0) დაამარცხა და და მიჯრით მე-12 გამარჯვება იზეიმა.

ნეაპოლელთა მხრიდან ჯოვანი სიმეონემ ორი გოლი შეაგდო, ჩოლიტოს დუბლის შემდეგ კი საბოლოო ანგარიში ოსტიგარდმა დააფიქსირა. ქართველი გულშემატკივრისთვის საინტერესოა, რომ ეს „ნაპოლისთვის“ პირველი მატჩი იყო მიმდინარე სეზონში, რომელმაც ხვიჩა კვარაცხელიას გარეშე ჩაიარა.

მატჩის მიწურულს ლუჩანო სპალეტიმ ქართველი ფეხბურთელის თამაშში ჩართვა გადაწყვიტა, თუმცა მალევე გადაიფიქრა და მის ნაცვლად მინდორზე ალესიო ძერბინი შეუშვა. იტალიელმა სპეციალისტმა მატჩის შემდეგ გამართულ პრესკონფერენციაზე ეს გადაწყვეტილება ახსნა. მან ასევე გუნდის მოგებათა სერიაზეც ისაუბრა.

„მარადონას ნაპოლის რეკორდის გაუმჯობესება? ვფიქრობ, რომ დიეგო ამ ნაპოლით იამაყებდა. მინდოდა, კვარასთვის ბოლო 15 წუთი მიმეცა და ბურთის შენარჩუნებაც გვჭირდებოდა, რის გამოც დავუძახე კიდეც, რომ მოედანზე შემეყვანა, მაგრამ მერე მესამე გოლი გავიტანეთ და სკამზე დაბრუნება ვთხოვე. მან ეს კარგად მიიღო და უხმოდ დამეთანხმა. ეს აჩვენებს, რომ ყველა ფეხბურთელი გუნდის განკარგულებაშია და ფეხბურთელებისგან ასეთი ხელმისაწვდომობა ჩემს კარიერაში თითქმის არ მახსენდება“, - აღნიშნა სპალეტიმ.

„ნაპოლის“ ჩემპიონთა ლიგის A ჯგუფში 5 ტურში 15 ქულა აქვს და „ლივერპულთან“ თუ 4-ბურთიანი სხვაობით არ წააგებს, პირველ ადგილს დაიკავებს. ნეაპოლელებს ბოლო 12 თამაში მოგებული აქვთ, რაც ამ კლუბის ისტორიაში საუკეთესო შედეგია.