24 სექტემბერი, 2022

შაბათს პეკინში ვითარება მშვიდია, ჩინეთის დედაქალაქის მოსახლეობა პარკებში სეირნობს და საყიდლებზე დადის, უსაფრთხოების ზომები არ არის გაძლიერებული, ამის შესახებ "რია ნოვოსტი" იუწყება.

მანამდე ინტერნეტში გაჩნდა სრულიად დაუდასტურებელი ინფორმაცია ჩინეთში შესაძლო სახელმწიფო გადატრიალების და ძალაუფლების სამხედროების ხელში გადასვლის შესახებ.

ჩინეთის დედაქალაქის მაცხოვრებლები აქტიურად ემზადებიან "ოქროს კვირეულისთვის" - ხანგრძლივი შვიდდღიანი უქმეებისთვის ჩინეთის სახალხო რესპუბლიკის დაარსებიდან (რესპუბლიკის გამოცხადებიდან) 73 წლის იუბილესთან დაკავშირებით, რომელიც 1 ოქტომბერს აღინიშნება. ქვეყნის მთავარ, ტიანანმენის მოედანზე უკვე დამონტაჟდა ტრადიციული ყვავილების კომპოზიცია „ყვავილების და ხილის კალათა“, რომელიც ყოველწლიურად უამრავ ტურისტს იზიდავს.

ფართომასშტაბიანი სადღესასწაულო ღონისძიებები, მათ შორის აღლუმი, არ იგეგმება. 30 სექტემბერს ტიანანმენის მოედანზე გაიმართება ჩინეთის ეროვნულ და რევოლუციურ ბრძოლაში დაღუპული გმირების ხსოვნისადმი მიძღვნილი ყოველწლიური საზეიმო ცერემონია. ტრადიციულად მასში მონაწილეობს ქვეყნის მთელი ხელმძღვანელობა და ჩინეთის კომუნისტური პარტია.

პეკინში შესვლა და ქალაქიდან გასვლა უპრობლემოდ არის შესაძლებელი. თვითმფრინავისა და მატარებლის ბილეთების ყიდვა, ჩვეულებისამებრ, ნებისმიერი მიმართულებით ხდება, თუმცა, დღესასწაულების წინ, როგორც წესი, მათზე მაღალი მოთხოვნაა და ფასი იმატებს. ტელეარხები, საინფორმაციო სააგენტოები, გაზეთების ვებგვერდები ჩვეულ რეჟიმში მუშაობს, სოციალური ქსელების მუშაობაში შეფერხებები არ ფიქსირდება.

ინტერნეტში ასევე გავრცელდა ცნობა იმის შესახებ, თითქოს პეკინის აეროპორტში 6000 ფრენა გაუქმდა, თუმცა, ოფიციალური ცნობებით, დედაქალაქის ორ აეროპორტში შაბათს ჯამში მხოლოდ 921 რეისის გაუქმება დაფიქსირდა. ფრენების გაუქმება და შეფერხებები ჩინეთში რეგულარულად ხდება სხვადასხვა მიზეზის გამო, მათ შორის ამინდის ფაქტორებისა და ეპიდემიოლოგიური სიტუაციის გათვალისწინებით. ფრენების ან მატარებლების განრიგის მასობრივი გაუქმების შესახებ ინფორმაცია არ ყოფილა.