22 სექტემბერი, 2022

რუსეთის ფედერაციის პრეზიდენტის პრესმდივანმა, დიმიტრი პესკოვმა უარყო გავრცელებული ინფორმაცია, თითქოს ნაწილობრივი მობილიზაციის ფარგლებში რუსეთში 1 მილიონამდე ადამიანის გაწვევა იგეგმება.

მანამდე, გამოცემამ "Новая газета. Европа" ("ახალი გაზეთი. ევროპა") განაცხადა, რომ ნაწილობრივი მობილიზაციის შესახებ დადგენილების დახურული მეშვიდე პუნქტი 1 მილიონამდე ადამიანის გაწვევის შესაძლებლობას გულისხმობს.

"ეს ტყუილია", - განაცხადა პესკოვმა.

შეგახსენებთ, რომ რუსეთის ფედერაციის პრეზიდენტმა ვლადიმერ პუტინმა ქვეყანაში ნაწილობრივი მობილიზაცია გამოაცხადა და შესაბამის განკარგულებას ხელი მოაწერა. განკარგულებაში სულ 10 პუნქტია, აქედან მე-7 პუნქტი ოფიციალურად არ გამოქვეყნებულა. როგორც დოკუმენტშია აღნიშნული, ის "სამსახურებრივი გამოყენებისთვის" არის განკუთვნილი.

გამოცემა "Новая газета. Европа"-ს მტკიცებით დადგენილების მეშვიდე პუნქტში 1 მილიონამდე ადამიანის გაწვევის შესაძლებლობაზეა საუბარი. რუსეთის თავდაცვის მინისტრის, სერგეი შოიგუს განმარტებით, ქვეყანაში მიმდინარე ნაწილობრივი მობილიზაციის ფარგლები 300 ათასი ადამიანის გაწვევაა დაგეგმილი.