უნგრეთი და თურქეთი ორმხრივი ურთიერთობების კიდევ უფრო გაღრმავებაზე შეთანხმდნენ, – ამის შესახებ უნგრეთის საგარეო საქმეთა მინისტრმა, პიტერ სიიარტომ თურქეთის პრეზიდენტის უნგრეთში ვიზიტზე საუბრისას განაცხადა.

მისივე თქმით, რეჯეფ თაიფ ერდოღანი და ვიქტორ ორბანი ორ ქვეყანას შორის სტრატეგიული პარტნიორობის ჩამოყალიბებაზე და კრიზისულ სიტუაციებში ურთიერთდახმარების შესახებ ხელშეკრულების ხელმოწერაზე შეთანხმდნენ.

უნგრეთის საგარეო საქმეთა მინისტრმა ასევე აღნიშნა, რომ უნგრეთი თურქეთიდან გაზის იმპორტით არის დაინტერესებული. სიიარტოს თქმით, მას შემდეგ, რაც ბუნებრივი აირის აზერბაიჯანიდან და თურქმენეთიდან ევროპის ბაზარზე იმპორტის შესახებ შეთანხმება ძალაში შევა, თურქეთის სატრანზიტო როლი კიდევ უფრო გაძლიერდება.

ბუდაპეშტში აცხადებენ, რომ ერდოღანი უნგრეთს კიდევ ერთხელ 18 დეკემბერს ესტუმრება, როდესაც სტრატეგიული საბჭოს უმაღლესი დონის შეხვედრა გაიმართება.