პიტერ სტანო - ევროკავშირი გმობს ლუკაშენკოს ვიზიტს აფხაზეთში, ეს ვიზიტი განხორციელდა საქართველოს მთავრობის თანხმობის გარეშე, რომელიც არის აფხაზეთის ერთადერთი ლეგიტიმური ხელისუფლება
29 სექტემბერი, 2022
ევროკავშირი მკაცრად გმობს აფხაზეთში ბელარუსის პრეზიდენტის, ალექსანდრე ლუკაშენკოს ჩასვლას და ამას საერთაშორისო სამართლის დარღვევად აფასებს. ამის შესახებ ბრიუსელში გამართულ ბრიფინგზე ევროკომისიის პრესსპიკერმა, პიტერ სტანომ განაცხადა.
„ევროკავშირი მკაცრად გმობს ალექსანდრე ლუკაშენკოს ვიზიტს საქართველოს რეგიონში - აფხაზეთში. ეს ვიზიტი განხორციელდა საქართველოს მთავრობის თანხმობის გარეშე, რომელიც არის აფხაზეთის რეგიონის ერთადერთი ლეგიტიმური ხელისუფლება. ასე რომ, ეს ვიზიტი არღვევს საქართველოს სუვერენიტეტს, ტერიტორიულ მთლიანობას და წარმოადგენს საერთაშორისო სამართლის უხეშ დარღვევას. ერთადერთი, რაც შემიძლია, დავამატო არის ის, რომ დავადასტურო ევროკავშირის მტკიცე და ძლიერი მხარდაჭერა საქართველოს ტერიტორიული მთლიანობისა და სუვერენიტეტისადმი საერთაშორისოდ აღიარებულ საზღვრებში“, – აღნიშნა პიტერ სტანომ.
როგორც ცნობილია, 28 სექტემბერს ბელარუსის პრეზიდენტი, ალექსანდრე ლუკაშენკო ოკუპირებულ აფხაზეთში ჩავიდა, სადაც ოკუპირებული აფხაზეთის დე-ფაქტო პრეზიდენტს, ასლან ბჟანიას შეხვდა.
საქართველოს საგარეო საქმეთა სამინისტრომ ლუკაშენკოს ოკუპირებულ აფხაზეთში ჩასვლის გამო, ბელარუსის მხარეს დამატებითი განმარტებები მოსთხოვა და საგარეო უწყებაში, პროტესტის ნიშნად, საქართველოში ბელარუსის ელჩი, ანატოლი ლისი დაიბარა.
