პიტერ სტანო - რუსეთის პრეზიდენტმა უნდა შეწყვიტოს ძალიან საშიში ბირთვული თამაში, ის ბირთვულ ელემენტს იყენებს ტერორის არსენალად, რაც მიუღებელია
21 სექტემბერი, 2022
რუსეთის პრეზიდენტმა უნდა შეწყვიტოს თავისი ძალიან საშიში ბირთვული თამაში, – ამის შესახებ ევროკომისიის წარმომადგენელმა, პიტერ სტანომ პრესკონფერენციაზე განაცხადა.
მისი თქმით, საერთაშორისო საზოგადოებამ უნდა განახორციელოს პუტინზე ზემოქმედება, რათა მან შეწყვიტოს ასეთი უგუნური საქციელი.
„პუტინი ბირთვულ თამაშს თამაშობს. ის ბირთვულ ელემენტს იყენებს ტერორის არსენალად, ეს მიუღებელია. ვფიქრობ, ეს ნათლად აჩვენებს ყველა მის განზრახვას, თუ რამდენად შორს შეუძლია მას წასვლა, რათა გააგრძელოს ეს უკანონო და გაუმართლებული ინტერვენცია, აგრესია უკრაინელი ხალხის წინააღმდეგ“, – განაცხადა პიტერ სტანომ.
ევროკომისიის წარმომადგენელმა ასევე განაცხადა, რომ ევროკავშირი არ აღიარებს უკრაინაში ოკუპირებულ რეგიონებში „ყალბ, უკანონო რეფერენდუმებს“.
„პრეზიდენტ პუტინის გამოსვლა და მისი განცხადებები ე.წ. რეფერენდუმებისა და ნაწილობრივი მობილიზაციის შესახებ მორიგი დადასტურებაა, რომ პუტინის ინტერესში არ შედის მშვიდობა. ის დაინტერესებულია თავისი აგრესიული ომის ესკალაციით. ეს ასევე მისი სასოწარკვეთილების მორიგი ნიშანია“, – განაცხადა პიტერ სტანომ.
ავტორი - ქეთი ჩოხელი
