პოლონეთი თავის მოქალაქეებს ბელარუსის დატოვებას ურჩევს
პოლონეთის ხელისუფლება თავის მოქალაქეებს ბელარუსის დატოვებისკენ მოუწოდებს, ვინაიდან უკრაინაში ომის დაწყების შემდეგ ორ ქვეყანას შორის ურთიერთობა მკვეთრად დაიძაბა. ინფორმაციას სააგენტო "როიტერი" ავრცელებს.
სექტემბერში მსგავსი რეკომენდაცია პოლონეთმა რუსეთში მყოფ მოქალაქეებსაც მისცა და მათ ქვეყნის (რუსეთის ფედერაციის) დატოვება ურჩია.
"პოლონეთის მოქალაქეებს, რომლებიც ბელარუსის ტერიტორიაზე იმყოფებიან, მოვუწოდებთ დატოვონ ქვეყანა შესაძლო კომერციული თუ კერძო საშუალებებით", - ამის შესახებ პოლონეთის მთავრობის მიერ მოგზაურებისთვის გამოქვეყნებულ რეკომენდაციაშია აღნიშნული.
ვარშავასა და მინსკს შორის ურთიერთობა 2021 წელს გაუარესდა, როდესაც პოლონეთმა ბელარუსი თავის საზღვართან მიგრაციული კრიზისის ხელოვნურად შექმნაში დაადანაშაულა. ორ ქვეყანას შორის ურთიერთობა უკრაინაში რუსეთის ინტერვენციის შედეგად კიდევ უფრო დაიძაბა.
ოფიციალური ვარშავას განმარტებით, ბელარუსში მცხოვრები პოლონური უმცირესობა ბელარუსის სახელმწიფოს მხრიდან რეპრესიებს განიცდის, თემის ზოგიერთი ლიდერი კი დაპატიმრებულია.
