პოლონეთის პრეზიდენტმა, ანდჯეი დუდამ ეროვნული რეფერენდუმის შესახებ კანონში ცვლილებას მოაწერა ხელი, რომელიც საპარლამენტო არჩევნების დღეს, 15 ოქტომბერს, პლებისციტის ჩატარების საშუალებას იძლევა. ინფორმაციას ამის შესახებ პოლონეთის პრეზიდენტის აპარატი ავრცელებს.

კანონში შეტანილი ცვლილებით შესაძლებელი ხდება, რომ პოლონეთში საპრეზიდენტო, საპარლამენტო ან ევროპარლამენტის არჩევნების დღეს ეროვნული რეფერენდუმი ჩატარდეს.

რეფერენდუმის ჩატარება შესაძლებელი იქნენა 07:00 საათიდან 21:00 საათამდე.

რეფერენდუმზე პირველი შეკითხვა ეხება მნიშვნელოვანი სახელმწიფო აქტივების უცხოურ იურიდიულ პირებზე მიყიდვას, მეორე – საპენსიო ასაკის გაზრდას, მესამე – ევროკავშირის ქვეყნებს შორის მიგრანტების განაწილების მექანიზმს და მეოთხე – პოლონეთსა და ბელარუსს შორის საზღვარზე ღობის დემონტაჟს.

მანამდე პოლონეთის სეიმმა უარყო სენატის პროტესტი, რომელთა უმრავლესობასაც ოპოზიციური პარტიები წარმოადგენენ. ისინი ეროვნული რეფერენდუმის შესახებ კანონში ცვლილებების შეტანის წინააღმდეგი იყვნენ.