პოლონეთმა კიევში გამართულ თავდაცვითი მრეწველობის ფორუმზე მიწვევა ერთ-ერთმა პირველმა მიიღო, თუმცა ქვეყანას ღონისძიებაში მონაწილეობა არ მიუღია, – ამის შესახებ პოლონურ მედიასთან ინტერვიუში პოლონეთში უკრაინის ელჩმა, ვასილი ზვარიჩმა განაცხადა.

ჟურნალისტმა დიპლომატს ჰკითხა, თუ რატომ არ იმყოფებოდა პოლონეთის წარმომადგენელი კიევში თავდაცვითი ინდუსტრიის წარმომადგელთა შეხვედრაზე.

"ეს შეკითხვა პოლონურ მხარეს უნდა დაუსვათ, რადგან პოლონეთი ერთ-ერთი პირველი იყო, ვინც ღონისძიებაზე მოწვევა მიიღო. ეს არის თითოეული ქვეყნის სუვერენული გადაწყვეტილება. ჩვენ ვაგზავნით მოწვევას, ხოლო ქვეყანა თავად წყვეტს, საკუთარი ინტერესებიდან გამომდინარე, მიიღოს ის თუ არა. ამიტომ, ჩვენ პატივს ვცემთ მსგავს გადაწყვეტილებებს, მაგრამ ეს არ არის იმის მიზეზი, რომ უკრაინას დავაბრალოთ ის, რომ პოლონეთი არ იყო ამ ღონისძიებაზე“, – განაცხადა უკრაინის ელჩმა.

კიევში თავდაცვის მრეწველობის ფორუმი 29 სექტემბერს გაიმართა. მასზე უკრაინის პრეზიდენტმა ვოლოდიმირ ზელენსკიმ, სხვა საკითხებთან ერთად, თავდაცვის მრეწველობის ალიანსის შექმნა დააანონსა. შეხვედრის შემდეგ საგარეო საქმეთა მინისტრმა დმიტრო კულებამ გამოაცხადა, რომ ეს არის "ახალი ერა" უკრაინის თავდაცვის ინდუსტრიისთვის.